Præsident Birna-pillugu suliamut: Nerioqatigiillutalu ernumaqatigiippugut
Arnaq 20-nik ukiulik, Birna Brjánsdóttir siorna januaarip qiteqqunnerani tammaaneqalersoq aatsaat sapaatip akunnera qaangiummat toqungasoq nassaarineqarpoq.
Tamatumalu kingorna Islandip oqaluttuarisaanerani toqutsisumik ujaasinersaarsuaqalerluni.
Inuit kajumissutsiminnik ujaaseqataapput toqutsinerlu islandimiorpassuarnit attortissutigineqaqaluni.
Præsidentip, Guðni T. Jóhannessonip ukiortaami oqalugiarami upalungaarsimanermut suliaqartut SAR-imeersut innuttaasullu ikiuussimaneri eqqaavai.
AAMMA ATUARUK Birna-sagen har været usædvanlig på flere måder
Præsidentilli aamma maluginiarsimallugu oqaatigaa, alianartoq tamanna pillugu inuiaat akornanni ataatsimuulernermik ersissitsisimasoq.
- Nerioqatigiippugut, ujaaseqatigiippugut ernumaqatigiillutalu qinusarsimaqaagut, Guðni T. Jóhannesson oqarpoq.
Birna Brjánsdóttiri tammaaneqalermat, kalaaleq Thomas Møller Olsen toqutsimasutut pasineqarluni tigusarineqarpoq. Toqutsimasutut ikiaroornartumillu eqqussisimasutut septemberimi eqqartuunneqarami ukiut 19-t parnaarussassanngortinneqarpoq.
Unnerluussisussaatitaasoq naalagaaffiullu eqqartuussissuserisuata tullia, Kolbrún Benediktsdóttir naapertorlugu pineqaatissiissut sakkortuvoq. Islandimi suliaq nalinginnaanngitsuusoq, unnerluussisussaatitaasup oqaatigaa.
- Uanga suliamik allamik taama sakkortutigisumik eqqaamasaqanngilanga, niviarsissap illoqarfimmiit angerlanngitsoorsimaneranik suliamilluunniit taamatut isikkulimmik, unnerluussisussaatitaasoq oqarpoq.
AAMMA ATUARUK Birnamik toqutsineq ikiaroornartulerinerlu ukiuni 19-ini parnaarussaassutigissagaa
Toqutsisoqarnerani suliaq nunarsuarmi tamarmi tusagassiorfinnit ukkatarineqarpoq, islandimiorpassuarnulli pingaartumik sunniuteqarluni.
- Suliaq aallarteqqaarmat tammaaneqartup ujaarineqarneranut tunngavoq, kikkut tamarmik ujaasipput - taamaammat islandimiut tamangajammik suliap aallarteqqaarneraniilli, Peqataalerput, Kolbrún Benediktsdóttir oqarpoq.
Thomas Møller Olsenip pineqaatissiissut Islandimi landsretsimut ingerlateqqipaa, suliarlu ukiormanna suliarineqassalluni.
AAMMA ATUARUK Unnerluussisussaatitaasup eqqartuussut naammagisimaaraa
