Unnerluussisussaatitaasup eqqartuussut naammagisimaaraa

Birnamut tunngatillugu eqqartuussivimmi suliami unnerluussisusup kalaallip angutip, Thomas Møller Olsenip islandimiumut arnamut toqutsisutut eqqartuunneqarnera naammagisimaarpaa.
Assi © : Flickr/Reykjavik Metropolitan Police
Allattoq Thomas Munk Veirum, Anton Gundersen Lihn
septembarip 29-at 2017 14:17

Angut kalaaleq toqutsisutut hashimillu anngiortumik eqqussisimasutut eqqartuunneqarluni ukiuni 19-ini parnaarussaasussanngorpoq.

- Unnerluussisussaatitaasunit piumasatsitut ukiunik 19-inik pineqaatissinneqarpoq, naalagaaffiup eqqartuussissuserisuata tullia, eqqartuussivimmilu suliami unnerluussisoq, Kolbrún Benediktsdóttir eqqartuussummik naammagisimaarinnilluni oqarpoq.

Taassuma eqqartuussut sakkortunerarpaa, Islandimimi toqutsisoqaraangat ukiuni 16-ini parnaarussaanissaq pineqaatissiissutaasarnera nalinginnaanerummat.

Thomas Møller Olsenip hashimik 20 kiilumit angiortumik eqqussisimasutut aamma eqqartuunneqarpoq.

AAMMA ATUARUK Birnamik toqutsineq ikiaroornartulerinerlu ukiuni 19-ini parnaarussaassutigissagaa

Unnerluussisussaatitaasorli naapertorlorlugu eqqartuussutit ataasiakkaarlugit ukiuni qassinik naleqarnersut naatsorsorneqarsinnaanngillat,  hashimullu tunngasortaa ukiunik marlunnik naleqarsimassasoq, taamaammallu Birnamut toqutsinermut parnaarussaasussanngotineqarnera ukiunik 17-inik sivisussusilerneqarsiassasoq, nammineq nalilerpaa.

Unnerluussisussaatitaasup Islandimi pissutsit tunngavigalugit eqqartuussut sakkortusoq erseqqissaatigaa.

- Toqutsisoqarneq pissutigalugu ukiunik 16-inik sivisussulilikkamik ukiuni kingullerni qulini parnaarussassanngortoqarsimanngilaq.

Kolbrún Benediktsdóttir nasuiaavoq, eqqartuussissutit sakkortuneranut qanoq toqutsisimaneq, Thomas Møller Olsenip iliuutsimi malunnaataanik piiaariarsimanera inuttaaqatiminillu eqqartuusivimmi pisuutitsiniarsimanera peqqutaasut.

Thomas Møller Olsenip eqqartuussivimmi suliaq suliassanngorteqqikkusunnerlugu sapaatit akunneri sisamat eqqarsarnissamut maanna periarfissaraa. Suliaq suliassanngorteqqissappagu, tamanna Islandip eqqartuussisuuneqarfiani januaarip aallaqqaataaniit suliassanngiusssaq.

Eqqartuussivimmut suliassanngortitseqqinneq aatsaat aalajangerneqareerpat angut sumi pillagaassanersoq aalajangerneqassaaq.

KNR-ip angutip illersuisua attaveqarfigaa. Taassumali eqqartuussut oqaaseqarfigerusunngilaa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk