Venstre Issittumut tunngasunik oqaaseqartartortaartoq

Venstrekkunni aasaq pisoqalaavissorpoq, ilaatigummi Kristian Jensen Venstrep siulittaasuata tulliatut tunuarnermini Venstremiit oqaaseqartartuujumajunnaarpoq. Issittumulli tunngasunik maanna oqaaseqartartussanngorpoq. 

Kristian Jensenip, Marcus Knuth De Konservativenut qaammammi kingullermi nuuttoq, paarlassavaa. Tamatuma saniatigut Kristian Jensen nunanut allanut ataatsimiititaliami aamma siulittaasunngorpoq. Parteeqatikunilu, Marcus Knuth, tassani aamma paarlappaa.

35-nik ukiulik, Christoffer Melson, ukioq manna juunip qaammataani qinersinerup kingorna Folketingimi ilaasortanngortoq, Venstrep nunatsinnut tunngasunik oqaaseqartartorileraa, Altinget allaaserisaqarpoq.

Kristian Jensen Venstremi avissaartuuttoqareersorlu Venstrep siulittaasuata tulliatut aggustimi tunuarpoq. Lars Løkke Rasmussen Venstrep siulittaasuatut taamani aamma tunuarpoq.

Tamatuma kingorna Jakob Ellemann-Jensen Venstrep siulittaasuatut qinigaavoq, massa Inger Støjbergip Kristian Jensen paarlakkaa.

AAMMA ATUARUK Venstre nunatsinnut tunngasunik oqaaseqartartua taarsissasoq

Venstrekkormiut aasaq avissaartuutereernerminni Folketingemi oqaaseqartartussanik toqqaaneranni Kristian Jensen toqqagaanngilaq.

- Kristian Jensen pituttorsimaffiunnginnerusumik atuuffeqarusunnini pissutigalugu politikkikkut oqaaseqartartuuffeqarusussimanngilaq, Ellemann-Jensen tamatumunnga atatillugu septembarimi oqarpoq.

Kristian Jensen tamanna pillugu taamani ima oqarpoq:

- Aalariarfissaqarnerunissara kissaatigaara. Ataatsimiititaliami sapaatit akunneri tamaasa ataatsimiinnertalinnik sammisamut oqimaatsumut tunngasunik oqaaseqartartuuffeqarusunngilanga.

Kingusinnerusukkulli oqaaseqartartunngoqqinnissani ammaffiginerarlugu aamma oqaatigaa.