Kielsen: Namminersulernermut aqqut akisuallaalersinnaavoq

Naalakkersuisut siulittaasuata Kim Kielsenip erseqqissarpaa namminersulerneq isumaqassappat innuttaasut ineriartornermut malinnaasinnaasariaqartut.

Namminersulernissaq siunissami anguniagassatut piviusutut oqallisiginninnerani Kielsenip imminut toquttarneq eqqartugassatut erseqqissaassutigaa.

- Killiffigaarput ukiut qulit ingerlaneranni nunaqqatitta 500-it imminut toqunnermikkut inuunertik kipitissimagaat, taakkunannga meeqqat 6o-it. Nunap namminersulinnginnerani inuiaqatigiinni ajornartorsiutit ilungersunartut tamakkiisumik aaqqissimanngikkutsigit nunap namminersulerneratigut suna angussagatsigu? Kim Kielsen oqaaseqarnermini Naalakkersuisut nittartagaanni aperivoq.

Nalornisigineqassanngilarli Kim Kielsenip siunissami arlaanni namminersulernissarput upperimmagu. Kisianni inuiaqatigiinni ilungersunartunik aaqqeqqaangassatsinnik ajornartorsiuteqarpugut.

- Nunami innuttaasut tamarmik sulinermut peqataasariaqarput. Taamaattumik ukiuni makkunani inuiaqatigiit ilinniartitaanerat kivinneqartariaqarpoq, innuttaasullu tassaasut nunatta pisuussutaasa annersaat, sutigut tamatigut nukittunerulertariaqarput - taamaattumik suliassaqaqaagut, siulittaasoq oqarpoq.

Sermitsiaq.AG ungasinngitsukkut innuttaasut akornanni misissuigami paasivaa 44 procentit namminersornissaq kissaatigigaat aatsaat aningaasaqarneq ajorseriassanngippat.