Kalaallit Nunaat nunat killerniittut qaartartunut ungasissumiit igeriuttakkanut illersuusiaanut pingaaruteqarluinnarpoq.

Taama oqarpoq USA-p vicepræsidentia J.D. Vance Fox Newsimut, danskit nalunaaqutaat malillugu pingasunngornerup unnuaani  apersorneqarnermini. Tassani Kalaallit Nunaata nunallu kitaaniittut isumannaatsuunissaannik naammattumik Danmarkip Europallu isumaginnissinnaannginnerinik arlaleriarluni isornartorsiuivoq.

- Kalaallit Nunaat uagut nunatta isumannaatsuuneranut pingaaruteqaannanngilaq, silarsuarmili isumannaatsuunermut aamma pingaaruteqarpoq, Vance Fox Newsimut oqarpoq.

- Qaartartunut ungasissumiit igeriuttakkanut illersuusiamut atortulersuutit tamarmik Kalaallit Nunaannut ilaatigut attuumassuteqarput, vicepræsidenti nangippoq.

Taava Ruslandip Kinalluunniit nunanut killernut qaartartumik ungasissumiit igeriuttakkamik aallartitsisinnaaneri eqqartorpaa.

- Oqanngilanga taamaaliussasut. – Neriukkaluarpunga taamaattoqanngisaannassasoq - Nunavissuatsinnulli Europamulluunniit atomimik sakkussiamik aallartitsisoqassagaluarpat - Kalaallit Nunaat qaartartunut ungasissumiit igeriuttakkanut illersuusiornermut pingaaruteqarluinnassaaq, Vance oqarpoq.

- Taamaattumik imminut aperisoqarsinnaavoq: Europamiut danskillu Kalaallit Nunaat isumannaallisarsimavaat nunarsuup sillimanissaani pingaarutilimmik inissisimalersinnaaqqullugu. Naagga, taamaaliorsimannginnerat ersarippoq.

Pereersunik tunngavilersuuteqartartut

Danmarkip USA-llu illersornissaq pillugu 1951-imi isumaqatigiissutaat tunngavigalugu USA Kalaallit Nunaanni sakkutooqarfeqareerpoq.

USA-p præsidentiata Donald Trumpip naalakkersuisuisa arlaleriarlutik Danmarkip Issittumi eqqaanilu isumannaallisaanermut iliuuserisimasai isornartorsiortarpaat. Amerikamiut Kalaallit Nunaannik piginnikkusulernerat Trumpip aamma arlaleriarluni oqaatigaa.

USA Kalaallit Nunaat pillugu qanoq iliuuseqarusutsiginersoq Vancep apersorneqarnermini toqqaannartumik akiumanngilaa. Tamanna Trumpip aalajangigassarigaa, Vance erseqqissaavoq. Aammattaaq danskit iligisartakkatut pitsaasutut oqaatiginninnerat pillugu oqaasii ilumuunnginnerarpai.

- Pereersunik tunngavilersuuteqartuaannaavipput. Oqartarput sorsunnersuarmi kingullermi peqqarniisaarniarnerulluunniit akiorneqarnerani sorsoqateqatigiissimasugut, tamannalu qujamasuutigaarput. Taamatut ileqarneq nuannaraarput. Silatusaartumik ukiut 25-t matuma siorna iliuuseqarsimaneq ullumikkut sianiilliortoqarsinnaannginneranik isumaqanngilaq, vicepræsidenti oqarpoq.

Naammattumik aningaasaliiffiginninngitsut

Nunatsinni russit Kinamiullu umiarsuarpassuaqarnerinik USA-p naalakkersuisuisa aamma oqaatigaat  - tamannalu danskit naalakkersuisuisa ilisarinngilaat.

J.D. Vance marsimi 2025-mi Amerikamiut Pituffimmi sakkutooqarfigisaannut tikeraarnermini Danmarkip nunatsinni iliuuserisimasai aamma isornartorsiorpai.

- Danmarkimut oqaatiginiagarput paatsuugassaanngilaq: Sullissilluarsimanngilasi. Kalaallit Nunaanni innuttaasut isumannaallisaanerlu naammattumik aningaasaliiffigineq ajorpasi. Tamanna allanngortariaqarpoq, taanna oqarpoq.

/ritzau/