Uummannami qaleralinniartoqaqqissinnaanngortoq
Uummannami umiatsiaararsorlutik aalisartut qaleralinniaqqissinnaanngorput, 138 tonsinimmi novembarimut qaleralittassinneqarmata.
Naalakkersuisut Uummannami qaleralinniarneq oktobarip sinnerani novembarimilu atuuttussamik oktobarip ulluisa 28-anni matugaluarpaat.
qaleralinniaqqissinnaanngorput,naalakkersuisoqarfigisani oktobarimut qaleralittassiissutit oktobarip qiteqqunnerani tamakkerlugit aalisarneqareeraluartut oktobarimi qaleralinniartoqaannarsinnaanissaanik nalunaaruteqaqqusimavaa. Uummannamilu aalisartut taamaalillutik novembarimut qaleralittassiissutit novembari aarlarteqqajanngitsoq tamakkerlugit aalisarpaat.
AAMMA ATUARUK Qeqertarsuup Tunuani qaleralinniartoqaqqissinnaanngortoq
Jens Immanuelsen Inatsisartut Aalisarnermut, Piniarnermut Nunalerinermullu Ataatsimiititaliaannit novembarip ulluisa aappaanni siunersioqatiserineqarpoq.
Ataatsimiititaliap, Jens Immanuelsen Uummannami oktobarimi qaleralinniaannartoqarsinnaaneranik akuerseriarluni Qeqertarsuup Tunuani qaleralinniarneq piffissaligaanngitsumik Uummannallu imartaani qaleralinniarneq decembarip tungaanut sooq unitsissimanerai, nassuiaaqquaa.
Ataatsimiititaliallu taakkunani qaleralinniartoqaqqissinnaalernissaa aamma kissaatigaa.
Naalakkersuisullu decembarimut qaleralittassiissutit novembarimut nuunnerisigut qaleralittassiissutinik maanna nuusseqqipput. Nuussaat 138 tonsiupput. 6.362 tonsit 2020-mut qaleralittassiissutaapput.
Uummannami aalisartut qujarukkaat - naammaginanngitsorli
Uummannami aalisartut qaleralinniarnerup ammaqqinneqarnera qujarukkaluaraat 138 tonsit ukiup sinneranut qaleralittassiissutigineqarnerat naammaginanngitsoq, aalisartut ilaannut ilaqutaasoq oqarpoq.
- 138 tonsit naammaqqajanngillat. Qaleralittassiissutit taakkua tamakkerlugit novembari immaqa suli naaqqajanngitsoq aalisarneqassapput, Inuutersuaq-Ulloriaq Løvstrøm oqarpoq.
- Qaleralinniarneq matuneqaqqissappat aalisartut kisimik eqqugaanatik Royal Greenlandip tunitsiviini sulisut aamma eqqugaassapput. Suliassaalatsinertik pissutigalugu angerlartitaassapput.
Uummannami aalisartut nalerisimaassappata qaleralittassiissutit pingasoriaataannik qaleralittassiisoqartariaqartoq, Inuutersuaq-Ulloriaq Løvstrøm nammineq aalisartuunngikkaluarluni naliliivoq. Avannaani sila aalisarfissaajunnaangajalertoq, taanna oqarpoq.
- 300-400-t tonsit missaat ukiup sinneranut qaleralittassiissutigineqaraluarpata naammaginassaaq. Avannaanimi sila kaperlannerani naalagaalertarpoq. Ullormut nalunaaquttap akunnerini pingasuni sisamaniluunniit taamaallaat qaamasarpoq. Aalisartullu taamaalinerani isumannaatsumik angalanissartik salliuttarpaat.
AAMMA ATUARUK Naalakkersuisoq retter ind efter samråd: Vil forhøje hellefiskekvote
Kaperlanneranilu sikuusarnera aalisartunut aamma akimmisitsisarput. Uummannap imartaa decembarimiit februuaarip naanerata tungaanut sikuusarpoq.
Sikuunerani qaleralinniartoqarpiartanngilaq, aatsaatllu marsip qaammataani qaleralinniartoqarlualeqqittarluni, Inuutersuaq-Ulloriaq Løvstrøm oqarpoq.
- Aalisartoqarpiarunnaarpallaartinnagu qaleralinniarneq ammaqqinneqartariaqarpoq, taanna oqarpoq.
Qeqertarsuup Tunuani qaleralinniarneq ammaqqittoq
Qeqertarsuup Tunuani qaleralinniarneq oktobarip ulluisa 28-anni unitsinneqareersorlu, tassani aalisartut qaleralinniaqqissinnaalerput.
Tassani sinerissap qanittuani umiatsiaararsorlutik aalisartunut qaleralittassiissutit 1.145 tonsinik amerlineqassasut, Naalakkersuisut sapaatit akunnerata siuliani sisamanngornermi aalajangerput.
Taamaalillutik ilisimatuut Qeqertarsuup Tunuani sinerissap qanittuani qaleralittassiissutissatut siunnersuutaat sinnerujussuarlugit qaleralittasseeqqipput.
5.120 tonsit 2020-mut qaleralittassiissutigineqassasut ilisimatuut siunnersuutigaat, ukiumulli qaleralittassiissutit Naalakkersuisut aalajangernerisa kingunerisaannik 9.325 tonsinngorlutik.
