Qeqertarsuup Tunuani qaleralinniartoqaqqissinnaanngortoq

Qeqertarsuup Tunuani Uummannallu eqqaani umiatsiaararsorluni qaleralinniarneq pisassat nungummata oktoberip 28-ani unitsinneqarpoq.

Qeqertarsuup Tunuani ukiumut pisassat tamakkerneqareersut qaavatigut 1145 tonsinik Naalakkersuisut pisassiisut, Naalakkersuisut tusagassiuutinut nalunaaruteqarput.

AAMMA ATUARUK Naalakkersuisoq retter ind efter samråd: Vil forhøje hellefiskekvote

Qeqertarsuup Tunuani qaleralinniat ukiup sinnernut pisassaalersut nungunnissaasa tungaanut ullumikkumit aalisaqqilersinnaasut, Naalakkersuisut aamma paasisutissiipput.

Taamaalilluni Qeqertarsuup tunuani TAC tassa umiatsiaaqqat 6 meteri ataallugu sinnerlugulu takissusillit pisassaat ilisimatuut ukioq mannamut 5120 tonsitut siunennersuutaat sinnerneqangaatsiarpoq. Maannami pisassanik qaffaanermi TAC 9325 tonsinngorallarpoq.

Uummannami aalisartoqarsinnaanngitsoq

Uummannalli eqqaani umiatsiaararsorlutik qaleralinniartut qaammat una pisassaqanngillat, decembarimili pisassaqarlutik. Pisassaat qaammammut uunga nuunneqarnissaat qinnutigineqarsimasoq misissorneqartorlu aalisarnermut naalakkersuisoqarfik KNR-imut paasissutissiivoq.

- Uummannami decembarimi suli pisassaqarput. Decembarimi pisassat qaammammut matumunnga nuunneqarsinnaanersut taavannga qinnuteqaatigineqarpoq. Tamanna nalilersorneqarpoq, Aalisarnermut piniarnermut nunalerinermullu naalakkersuisoqarfimmi pisortaq, Jørgen Isak Olsen KNR-imut allakkatigut akissuteqarpoq.

AAMMA ATUARUK Aqutsiveqarfinngortitsiniarneq naalakkersuisuutitaqartut isumaqatigiinngissutigaat

Taamaalillutik Uummannap eqqaani qaleralinniat qanoq pisoqarnissaa pillugu utaqqeqqilaartariaqassapput.