Aqutsiveqarfinngortitsiniarneq naalakkersuisuutitaqartut isumaqatigiinngissutigaat
- Akissuteqaataa tupaallaatigilaarpara, pissutigalugu aalajangigassaq taama pingaaruteqartigisoq naalakkersuisup siuliani oqaaseqartarnermini aalisarnermut ataatsimiititaliarsuup inassuteqaatissai utaqqimaaqqaarniarlugit oqarnikuummat, Inatsisartunut ilaasortaq Nunatta Qitornaaneersoq Aleqa Hammond oqarpoq.
Taassuma sammisaq toqqaannartumik isummerfiginngilaa Inatsisartunulli ilaasortat aalajangeeqataanissaat piumasaralugu.
Naalakkersuisulli Inatsisartut akuersiteqqarnaagit nalunaarutinik allannguinissaminnut pisinnaatitaapput.
AAMMA ATUARUK Qaleralinniarfiit ukioq nutaamiit aqutsiveqarfinngussasut
Demokraatit aalisarnermut naalakkersuisumut isumaqataapput.
- Aalisarnermi alloriaqqissagutta aalisarfiit aqutsiveqarfinngornissaat pingaartorujussuuvoq, Nivi Olsen oqarpoq.
Aqutsiveqarfiulersussat januaarip aallaqqaataani allanngorneranni pisassat ilaneqanngippata, taakkunani aalisartut pisassaarutilertortarnissaat, Avannaata Kommuniata aarleqqutigaa. Qaleralittassalli taamanikkussamut ilaneqarumaarnissaannut Demokraatit peqataassanersut Nivi Olsen maanna oqarumanngilaq.
- Avammut suaarutigisinnaasannik massakkut isummersuutissaqanngikkallarpunga, Nivi Olsen oqarpoq.
AAMMA ATUARUK Siunnersuut: Naalakkersuisut pisassiissuteqarfiunngitsut atorunnaasiinniarniaraat
Aleqa Hammodilli Avannaata Kommuniata aarleqqutigisaa paasilluarsinnaavaa
- Aqutsiveqarfiit allanngortinneqassappata, pisasseeriaaseq aamma pinngitsoorani allanngortinneqartariaqassaaq, Aleqa Hammond oqarpoq.
Naalakkersuisut aqutsiveqarfiit qanoq agguataarniarneraat assimi takuneqarsinnaavoq.