Avataani qaleralinniarnermi MSC-mik meqqilersuineq 2017-imi maajip qaammataani atuutilersinneqarmat, sinerissap qanittuani qaleralinniarluni aalisarfiit aqutsiveqarfinngornissaat piumasaqaataavoq.Assi: PR. Royal Greenland

Qaleralinniarfiit ukioq nutaamiit aqutsiveqarfinngussasut

Sinerissap qanittuani qaleralinniarfiit ukiortaamiit aqutsiveqarfinngornissaat aalisarnermut naalakkersuisup naatsorsuutigaa.

Aalisarnermut naalakkersuisup pingasunngormat ullaap tungaani inatsisartunut ilaasortanit apeqqarissaarfigineqarnermini sinerissap qanittuani qaleralinniarfiit killilersuiffiunngisut aqutsiveqarfinngornissaat ukiup aallartinnerani pisinnaasoq neriuutigaa.

- Nalunaarutip januaarip aallaqqaataa nallertinnagu piareernissaa naatsorsuutingalugulu neriuutingaara, Jens Immanuelsen Inatsisartut ataatsimiittarfiata oqaluttarfianit oqarpoq.

Kommune aarlerisoq

Namminersorlutik Oqartussat nalunaarutissaattut siunnersuutaat tusarniutigineqaqqammerpoq. Akissuteqartullu amerlanerpaartaat aqutsiveqarfinngortitsinissamut isumaqataapput.

Avannaata Kommuniali tusarniummut akissuteqaammini aarleqquteqarpoq.

- Killeqarfiit atorunnaarsinneqarpata pisassiissutillu ilaneqanngippata ukiumut pisassiissutit maannakkornit sukkanerujussuarmik nungupallanneqartalernissaat aarleqqutigaarput, taakkua allapput.

Allannguinissanilu tamani tusarniaanerni akissutit tusarniarneqartartut naalakkersuisoq oqarpoq.

- Inatsisissatut siunnersuutit suulluunniit suliassartaat tusarniaanerit aallaavingalugit suliarineqartarput, taanna atorlugu atuisut peqataassapput, Jens Immanuelsen oqarpoq.

AAMMA ATUARUK Siunnersuut: Naalakkersuisut pisassiissuteqarfiunngitsut atorunnaasiinniarniaraat

Avataani qaleralinniarnermi MSC-mik meqqilersuineq 2017-imi maajip qaammataani atuutilersinneqarmat, sinerissap qanittuani qaleralinniarluni aalisarfiit aqutsiveqarfinngornissaat piumasaqaataavoq.

- Avataani qaleralinniarnermi MSC eqqunneqarnikuuvoq. Taanna sinerissap qanittuani aalisarfiit tamarmik aqutsivinngortinneqarnissaannik piumasaqaatitaqarpoq, tassunga ingerlavugut qujanartumik, aalisarnermut piniarnermut nunalerinermullu naalakkersuisoq, Jens Immanuelsen oqarpoq.

Nunatsinni aalisarfiit tamarmik aqutsiveqarfinngortinneqassasut Naalakkersuisoqatigiit isumaqatigiissutaanni aamma allassimavoq.

Naalakkersuisut aqutsiveqarfiit qanoq agguataarniarneraat assimi takuneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat