Inuit Pisinnaatitaaffii pillugit Siunnersuisoqatigiinni siulittaasoq tunuartoq

Tukumminngiaq Olsen Lyberth Inuit Pisinnaatitaaffii pillugit Siunnersuisoqatigiinni (IPPS) siulittaasutut tunuarniarluni aalajangerpoq.

Taanna tamanna LinkedIn-ikkut nammineq allappaa.

- Ukiut najummatsisimanartut isumaqartullu aqqusaareerlugit Inuit Pisinnaatitaaffii pillugit Siunnersuisoqatigiinni siulittaasutut tunuassallunga aalajangerpunga, Tukumminngiaq Olsen Lyberth oqarpoq.

Taanna siulittaasuuginnarusukkaluarlu oqaatigaa, inuttulli ilungersunartut pissutigalugit siulittaasutut unittariaqarluni oqaatigaa: 

- Ukiorli imminut ilungersornartuusimasoq qaangiussillugu pingasunillu mikisunik meeraqarluni,  aallussinerpaanerluunniit ullormi unnuamilu akunnernik amerlanerulersitsisinnaanngitsoq nassuerutigisariaqarsimavara, Tukumminngiaq Olsen Lyberth oqarpoq:

- Tamatuma saniatigut nunat tamalaat akornanni FN-imi Board of Trustees for FN’s Voluntary Fund for Indigenous Peoplesimi suliaqarnera naammassiartulerpoq. Inuit nunallu inoqqaavisa pisinnaatitaaffii pillugit suliaqarninni immikkoortut pingaaruteqartut marluk taamaalillutik ataatsikkungajak naammassilerput.

Taassuma suliaqarnermini suleqatigisimasani naapissimasanilu qujassuteqarfigai.

- Ingammik naartunaveersaasersuisimanerup akisussaassuseqarnissamik, inatsisitigut isumannaatsuunissamik inuillu pisinnaatitaaffiinik ataqqinninnissamik uteriisiuteqartumik nukittuumik arlaannaannullu attuumassuteqanngitsumik nipeqarnissarput qanoq aalajangiisuutigisoq erseqqissarpaa,  taanna allappoq.

Tukumminngiaq Olsen Lyberth nunatta imartaata uumasuinik attanneqarsinnaasumik atuinissamik kalaallillu inuiaqatigiit suleqatigalugit immap illersornissaanik siuarsaaniaqatigiiffimmi, Oceans North Kalaallit Nunaanni, immikkut siunnersortitut atorfeqartuuvoq.

Taanna Issittumi inuiaqatigiilerinermi Ilisimatusarfimmiit kandidatiuvoq, imaani inuussutissarsiornermi inatsisilerineq inuit ilisimatusarnermini inuiaallu immikkut ukkatarisimallugu.

Islandimiittumi Akureyrip universitetiani avannaarsuani inatsisilerinermik aamma mastereqarpoq.