Borgmesterip nunanit allaneersut suliartortarnerat pillugu isornartorsiuineq akerlileraa

Nunanit allanit suliartortartut Kalaallit Nunaanni killilersorneqarnissaat sapaatit akunnerini kingullerni oqallisigineqarpoq. Borgmesterilli Malik Berthelsenip oqarnera naapertorlugu oqallinneq eqqunngilaq.

Allattoq Tôrtia Reimer-Johansen, Emil Weis

novembarip 02-at 2026 10:53

Qeqqata Kommuniata allaffiinut iseraanni pappiaqqat naqissuserneqarpalunnerat tusarsaavoq.

Borgmester Malik Berthelsenip (S) suliffeqarfiit kangiamiunik sulisussarsiornissamut qinnuteqaataat atsiorpai.

Kommunip kangianeersut qulit siorna sulisorilerpai. Taakkunannga tallimat Sisimiuni paaqqinnittarfinni sulisuupput, tallimallu Maniitsumi utoqqaat illuanni sulisuullutik. Naak sulisut qulit taamaallaat pineqaraluartut suliffeqarfinni oqilisaataangaatsiarnerat borgmesterip unnersiutigaa.

- Assorujussuaq unnersiutigineqarput sulisitsisumininngaanniit suleqatimininngaanniillu. Tassa oqilisaataapput annertuumik, Malik Berthelsen KNR-imut oqarpoq.

Naleqqap nunanit allaneersut suliartortarnerat Inatsisartuni sapaatit akunneri marluk matuma siorna oqallisigisassanngortippaa. Nunanit allaneersut nunatsinni sivisunerpaamik ukiuni sisamani sulisinnaasarnissaat partiimit isummiunneqarpoq.

Ilinniartitaanermut, kultureqarnermut, timersornermut ilageeqarnermullu naalakkersuisup Nivi Olsenip (D) nunanit allanit suliartortut nakkutigilluarnerujumallugit KNR-imut oqaatigaa.

Aamma atuarukNaleqqap nunanit allanit suliartortut ukiut sisamat qaangiukkaangata angerlartittalerusukkai

Naleqqap naalakkersuisullu nunanit allanit suliartortut nunatsinni innuttaasut suliffittaarsinnaanerannik akornusiinnginnissaat erseqqissaatigaat.

Malik Berthelsenili tusagassiuutinut nalunaarummi oqarpoq, nunanit allanit suliartortartut pissutigalugit inuit maani najugallit suliffittaarsinnaannginnerannik isumaqarneq isumaqataaffigineq ajorlugu.

- Sulileriaannaasutullu suliffissarsiortut ima ikitsigipput allaat suliffeqarfiit sulisussanik pisariaqartitaat kommunitsinniit matussuserneqarsinnaannatik, taanna oqarpoq.

Sulisut nalituut

Sulisussaaleqisoqangaarmat kangiamiut qulit Qeqqata Kommunianut siorna suliartortinneqartut nunatsinni sulinissaat ukiuni marlunnik sivitsorneqarpoq, Malik Berthelsen oqaluttuarpoq:

- Isumaqatigiissutaat uani ukiup naanerani naasussaagamik, taamaammat politikkikkut isumaqatigiissutigivarput maaniinnerat iluaqutaammat, taanna KNR-imut oqarpoq.

Kangiamiut nunatsinnut tikittartut kulturitsinnik oqaatsitsinnillu ilisimasaqanngeqqaartarput, taamaakkaluartoq sullarissuusut borgmesteri oqarpoq.

- Suliartortuaannaramik. Taakkunani pineqartuni sulisut amigartuaannaavinnertik pissutigalugu sulisut ilungersorlutillu qasupput, taakkualu suliartortuaannarnerat annertuumik iluaqutaavoq.

Aamma atuaruk Naalakkersuisoq: Nunanit allanit suliartortut nakkutigineqarnerusariaqarput

Sisimiuni Maniitsumilu inuleriffiit, soorlu meeqqeriviit utoqqaallu angerlarsimaffii kangiamiunik suli amerlanerusunik kissaateqarput.

- Toqqaannartumik oqaatigissagukku utoqqaat angerlarsimaffianni pisariaqartitsisoqarpoq maani. Taanna misissorparput. Amerlanerusunik suli tikisitsinissarput Maniitsumi utoqqaat angerlarsimaffianit kissaatigineqartorujussuuvoq, Malik Berthelsen oqarpoq.

Borgmesterip oqarnera naapertorlugu nunatsinni innuttaasut tamavimmik sullillutillu suliffissaqarput. Suliffissarsiortummi ikittuaraasut borgmesterip ilisimaaraa.

- Suliffissarsiorlutik allatsissimasut ima ikitsigipput allaat suliffeqarfiit pisariaqartitaanik allaat ikiorsinnaanatigit. Taamaammat allatut ajornartumik avataaniit tikisitsisariaqartarpugut, isumaqarpungalu tamanna nuannaarutigisariaqaripput nunatsinni sulisartorpassuit peqatigalugit nunatsinni aningaasarsiornerup ingerlaannarnissaa isumassorneqartariaqartullu isumassorneqarneranut ikiuutaammata.

Kangianeersut tassa, Filippinerit, Thailandimiut, Kinamiut asiameersullu allat amerlanerpaapput, 2026-illu aallartinneraniit 1.900-ullutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.