Uuliasiorneq oqaluuserilerpaat
Issittumi upalungaarsimanissaq pillugu Nunat Avannarliit ataatsimoorussamik aningaasaliinissaat pillugu Nunani Avannarlerni aningaasaqarnermut ministerit suleqatigiissitaliussasut, politikerit Nunanit Avannarlerneersut kajumissaarutiginiarpaat.
Issittup imartaani angallannerup annertusiartornera ilutigalugu upalungaarsimanissaq pillugu suleqatigiittoqarnerulernissaa matumani kissaatigineqarpoq, takornariartaatileqatigiillu akitsuutit aqqutigalugit aningaasaleeqataasarnissaat takorloorneqarpoq.
Issittumi uuliamik gassimillu qalluinermi isumannaallisaaniarnerit Nunat Avannarliit Siunnersuisoqatigiivisa ataatsimiinneranni aamma oqaluuserineqarumaarput.
Ajutoortoqarnissaa sapinngisamik pinngitsoortinniarlugu qalluinermut atatillugu malittarisassaliortoqarnissaa, Siunnersuisoqatigiit siunnersuutiginiarpaat.
Issittumilu innuttaasut eqqarsaatigalugit Issittoq pillugu ataatsimoorussamik iliuusissanik Nunat Avannarliit pilersitsisariaqartut, Siunnersuisoqatigiit siunnersuutigaat.
Nunat inoqqaavisa pisinnaatitaaffii oqallisigineqarnissaat pillugu Inuit Issittormiut Siunnersuisoqatigiiffiata pisortaa Alfred Jakobsen aamma Reykjavikiliarpoq, SIK ataatsimiinnermi aamma peqataatitaqassaaq, nunanit allanit sulisorineqartartut aningaasarsiaat pillugit oqallinnermut peqataassalluni.
Ilinniartitaanermut, Ilisimatusarnermut Nunanullu Avannarlernut suleqateqarnermut naalakkersuisoq Palle Christiansen Reykjavikimi aamma ataatsimeeqataassaaq, ataatsimiinnerlu pillugu Radioaviisimit aamma tusagassiisoqartarumaarpoq.
