Avatangiisinut illersuiniaqatigiit: Uulia kinertup Issittup imartaani angallannermi inerteqqutaanera qasungavallaarpoq

Umiarsuit uuliamik kinertumik usillutik issittup imartaani angallassisinnaajunnaarput.

Tamanna FN-ip inerteqquteqalerneratigut juulip aallaqqaataani atuutilersumik qulakkeerneqarpoq.

Inerteqqulli minitaqaqaaq, taakkulu avatangiisinut tunngasunut illersuiniaqatigiiffimmiit Green Global Futuremit isornartorsiorneqarput.

Umiarsuimmi assersuutigalugu iluleriinnik kujaaqarnermikkut issittumi angalanissaamut malitassanik malinnittut, ukiuni tallimani suli, tassa juulip aallaqqaataat 2029-p tungaanut, uuliamik kinertumik ingerlateqarsinnaapput.

Aamma nunat issittumiittut umiarsuit erfalasuminnik erfalasoqartut inerteqqummik malinnittariaqarunnaarsissinnaavaat.

Tamakkua avaqqutaareriarfissaavallaartut, Green Global Futuremi siunnersortaaneq, Kåre Press-Kristensen, isumaqarpoq.

- Tassalu umiarsuit sisamaagaangata pingasut inerteqqummik nutaamik malinnattariaqarnatilluunniit malinnittariaqarunnaarsinnaapput. Issittumilu imaatigut angallattut amerliartortut takuneqarsinnaavoq, taamaattumik tamanna ajornartorsiutaasorujussuuvoq taanna oqarpoq.

Umiarsuit iluleriinnik kujaallit uuliamik mingutsitsinissaat aarlerinannginnerusoq, taamaanneralli uuliap kinertup silaannarmut mingutsitsinissaanut iluaqutaanngitsoq, taanna erseqqissaavoq.

Taamaammat uuliamik kinertumik atuineq, Kalaallit Nunaanni inunnut avatangiisinullu suli ajoqusiisinnaaqisoq, taanna naliliivoq.

- Eqqaamaneqartariaqarpoq qalasersuaq kujallermi 2011-mili tamakkiisumik inerteqquteqalerpoq. Taamaattumik Issittumi avannarlermi assigusumik inerteqquteqalernissaa piffissanngorpoq.

Nunarput maleruagassanik sukannernerulersitsisariaqartoq

Uuliamik kinertumik inerteqquteqarneq FN-ip imaatigut angallannermut kattuffianit, nunat tamalaat imarsiornermut kattuffiannit (IMO) 2021-mi atuutilersinneqarpoq.

Malittarisassanillu tassuunaqquullugu sukateerinissaq ajornarluinnangajassasoq, Kåre Press-Kristensen-ip nassuerutigaa. Taamaattumik nunat issittumiittut namminneerlutik iliuuseqarnissaannik, taanna kaammattuivoq.

- Assersuutigalugu umiarsuit Issittumi uuliamik kinertumik ingerlateqarlutik angalasut umiarsualivinnut akiliutaat qaffarujussarneqarsinnaavoq, taamaalilluni uuliamik kinertumik ingerlateqarnissaq piumaneerutsinneqarsinnaavoq. Imaluunniit umiarsuit nunaminniit pigineqartut uuliamik kinertumik ingerlateqaqqusaajunnaarsisinnaavaat, taanna oqarpoq.

Siunnersortaanerup oqarnera naapertorlugu umiarsuaatileqatigiiffiit umiarsuaatimik ingerlataannik ingerlaannaq taarsiisinnaagaluarput.

- Ikummatissamik minguinnerusumik piumagaanni aqagu taarsiisoqarsinnaavoq. Motori allalluunniit allanngortinneqartariaqanngillat, minguinnerusunik ingerlatsiinnariaapput.

Ikummatissalli mingutsitsinnginnerusut uuliamit kinertumiit akisunerupput, taamaattumik taarsiineq umiarsuaatileqatigiiffinnut aningaasartuutaassaaq.
Kåre Press-Kristensenilli tamanna atuisut aakiliuteqarnerulernerannik kinguneqarumaartoq ilimaginngilaa.

- Eqqaamaneqartariaqarporli umiarsuarnik angallassineq Brugsenimi nioqqutip akianut sunniutikitsuararsuummat. Taamaattumik sunniuteqangaassanngilaq. Kalaallinut ilaqutariinnut agguaqatigiissillugu ullormut immaqa koruunialunnik malunniuteqassaaq, taanna oqarpoq.