Uulia kinertoq umiarsuarmi usineqartoq paasineqarmat umiarsuaq millionilikkaanik akiligassinneqarpoq
![](/sites/default/files/styles/image_934x467/public/2024-06/container-ship-in-the-sea-at-winter-time-2023-11-27-05-17-21-utc.jpg?itok=vlzPVnaa)
Irlandimiut umiarsuaat containerinik usilik ”Arklow Wind” nunap imartaatigut Svalbardikkoormat norskit avatangiisinut inatsisaannut unioqqutitsineruvoq.
Norgep Imarsiornermut Pisortaqarfianiik pisortat umiarsuarmut alakkaanerminni uuliamik kinertumik usisoqartoq paasisimavaat. Tamannalu unioqqutitsineruvoq.
Svalbard-ip guvernøria taama allappoq.
Norskillu pisortaqarfiata umiarsuup piginnittui en million norske koruuninik, tassa qallunaat aningaasanngorlugit 650.000-koruuninik akiligassippaat.
Saniatigullu umiarsuup naalagaa 30.000 norskit aningaasaanik aamma akiligassinneqarpoq.
- Ajutoortoqarsinnaanera aarleqqutigineqarpoq. Uuliamik kinertumik immamut pinngortitamullu ajoqusiilluinnartussamik kuuttoqassagaluarpat ajorluinnartumik kinguneqassaaq, tamannalu perusunngilarput. Lars Fause Svalbardip guvenøria NRK-mut taama oqarpoq.
Svalbardimi uuliamik kinertumik januaarip aallaqqaataani 2022-mi inatsit atulermalli umiarsuarmik usilimmik akiligassiineq siulliuvoq.
Irlandimi umiarsuaateqarfik umiarsuullu naalagaata akiligassaq tigulluanngilaat, suliarlu maanna Nord-Troms Tingret-mi oktobarimi suliarineqartussanngorpoq.
Kalaallit Nunaata imartaani inerteqquteqalerneq atuutilissaaq
Kalaallit Nunaannilu inatsimmik atuutsitsilernissaq aamma juulip aallaqqaataani atuutilersinniarneqarpoq.
2020-mili Naalakkersuisut uuliamik kinertumik inerteqquteqalerput. Folketingimiillu tapersersorneqarluni.
Inerteqquteqalerneq uuliamik mingutsitsinnginnissamut suliniutaavoq. Aammalu silaannarmut mingutsitsisinnaanissaanut inerteqqutaalluni, uulia kinertoq silaannarmi sananeqaatit minnernik aniatitsisuuvoq, soorlu ukuninnga: black carbon, CO2, aamma svovl.