Danmarkip uulia kinertoq Issittup imartaani angallannermi inerteqqutaalersinniaraa
![](/sites/default/files/styles/image_934x467/public/skib_roeg_til_web.jpg?itok=C0M8zAm4)
Uulia kinertoq Issittup imartaani angallannermi ukioq manna juulip aallaqqaataani inerteqqutaalissaaq.
Danmarkip avatangiisinut ministeria, Magnus Heunicke, tusagassiuutinut taama nalunaarpoq.
Uulia kinertoq umiarsuarnut ikummatissatut atugaavoq – aamma nunat tamalaat umiarsualiviisa akornanni assartorneqartarpoq.
Issittup imartaani uuliakoortoqarnerani mingutsinneqartarnerisa minnerpaaffimminniitsinneqarnissaat inerteqqutitigut anguniagaavoq, soorlu aamma silaannarmik mingutsitsineq annikillisarniarneqartoq, assersuutigalugumi uulia kinertoq uuliamut kininnginnerusumut naleqqiullugu silaannarmik mingutsitsinerusarmat. Uulia kinertoq black carboneqarnerullunilu, tassa paaqarnerullunilu CO2-qarnerullunilu ikuallassaateqarneruvoq.
Uulia kinertoq katersoruminaatsorujussuuvoq, uumasunut immallu naasuinut innarliisinnaalluni. Taamaammat umiarsuit Issittup imartaatigoortumik uuliamik kinertumik ingerlateqartannginnissaat useqartannginnissaallu pillugu inerteqquteqarnialerpugut, Danmarkip avatangiisinut ministeria Magnus Heunicke oqarpoq.
Uulia kinertoq, heavy fuel oilimik aamma taaguutilik, pinngortitami kigaatsumik nungukkiartuaartarpoq. Uulia kinertoq immamut pigaangat immap sikuata ataanut pisinnaavoq isorartuumullu siaruaassinnaalluni.
Naalakkersuisut uuliap kinertup Issittup imartaani angallannermi inerteqqutaalernissaanik siunnersuut novembarimi 2020-mi taperserpaat.