Qarasaasiatigut atortutigut ajornartorsiuteqarneq: Jens Peter umiatsiarluni Nuummut nakorsaatissaminik aalleraluarpoq
- Assut isumaqarpunga eqqugaangaatsialaarlunga. Pissanganikuunermik qungatsinni paasisaqarusullunga, alliartornersoq milliartornersorluunniit. Pakatsivunga assut.
Dronning Ingridip Napparsimmavissuata nakorsiartarfiani kisiartatuaalluni utaqqisarfimmiittoq Elsa Thorsen 65-inik ukiulik taama oqarpoq.
Elsa Thorsen ullumikkut qinnguartartittussaagaluarpoq, nunarsuarmili tamarmi qarasaasiakkut ajutoortoqarneq aamma peqqinnissaqarfiup qarasaasiaanik eqquisoq pissutigalugu qinnguartartissinnaanngilaq.
- Ulloq naallugu utaqqerujuussaanga, tungaanut utaqqinikuullunga. Pissangallunga assullu nuanniilliorlunga, Elsa Thorsen oqarpoq.
Qarasaasiat atortuisigut ajutoortoqarnera nunarsuup ilarujussuani eqquivoq.
Qarasaasianut viruseqalitsaaliissutip CrowdStrikemik taaguutillip nutarterutaasussaagaluartoq qarasaasiatigut atortunik ajutoortitsisoorpasippoq. Nutarteriniarneq Microsoftip nunarsuarmi attaveqaatiliaanik aqunneqartut atorsinnaajunnaarsitsisinnaajunnaarsitsivoq.
Peqqiqnnissaqarfik CrowdStrike atugarimmagu nunatsinni napparsimmaviit tamarmik qarasaasiaat eqqugaapput.
Peqqinnissaqarfimmi pisortaaneq Tina Amondsen KNR-mut ullaap tungaa taama oqarpoq.
Nunatsinni tamarmi peqqinnissaqarfiit qarasaasiatigut ajutooqqapput.
- Tamanna pissutigalugu nakorsiartorpaaluit ullumikkut sullinnissaat ajornakusoortissavarput. Tamanna nunatsinni tamarmi atuuppoq, nunap immikkoortuani Sermersuumi nakorsaaneq, Jesper Olesen oqarpoq.
Akunneq ataaseq akunnerullu affaa umiatsiamik angalasoq
Qarasaasiani atortutigut ajornartorsiorneq nakorsaatinik aalleraluartunut aamma eqquivoq.
KNR-ip aamma Jens-Peter Kleemann Nuummiillatsiaannartoq naapippaa. Taanna qaratsamigut ajoqusernikuugami iisartakkanik pisariaqartitaminik aalleraluarpoq.
- Ullormut sisamat iisussaagakkit, taavalu uanga Kangerlusuarmi najugaqarlunga, maani sulillunga Nuup avataani Polar Oliami. Imaaliallaannaq tikissinnaannginnatta umiatsimaik maanngartaratta.
Kangerluarsoruserminngaanniit Nuummut ullumi tikippoq.
Nakorsaatinik aallertarfimmut apuukkami, nakorsaatinik tunniussaqarsinnaanngitsut allaqqasoq naammattoorpaa.
Jens Peter Kleemann ullup ingerlanerani paasisaqarnerunissaminik ilimasuppoq, pisumullu paasinnialluarsinnaalluni.
- Jajja paasivara. Taanna nunarsuarmioqataanerput oqaatigisarpara. Uanga illillu iluarsisinnaanngisagut.
Jakku Møller Dronning Ingridip Napparsimmavissuata peqqissaavianukaraluartunut ilaavoq.
Jakku Møller aaversittarfimmut pingaarutilimmik tunniussiartoraluarluni oqarpoq. Maannali tunniussinnaannginnamiuk tunniussassani ataasinngorpamut nillataartitsivimminiitittariaqarpaa.
- Soorunami nukillalaajallannarpoq, imaannarluni ataasinngorpa aatsaat tunniukkiartortariaqarpakka. Taavalu tunniussassara uagutsinni nillaataartitsivimmi paarisariaqarpara.
