Nunarsuarmi tamalaani qarasaasiani atortutigut ajornartorsiuteqarneq pissutigalugu ullumikkut nakorsiartoqarsinnaanngitsoq

Nunatsinni tamarmi peqqinnissaqarfiit qarasaasiatigut ajutooqqapput.

- Tamanna pissutigalugu nakorsiartorpaaluit ullumikkut sullinnissaat ajornakusoortissavarput. Tamanna nunatsinni tamarmi atuuppoq, nunap immikkoortuani Sermersuumi nakorsaaneq, Jesper Olesen oqarpoq.

Taassuma innuttaasut ullumikkut nakorsiartussaagaluartut peqqinnissaqarfimmut sapaatip akunnerata tulliani attaveqarnissaat kaammattuutigaa.

- Ulloq ilivitsoq nakorsiartitsinngikkaangatta ulapingaatsiartarpugut. Taamaammat allattorsimasut tamarmik sianerfiginissaannut periarfissaqanngilagut. Taamaammat suliassaq tamanna inunnut tunniuttariaqarparput – Ilissi uagutsinnut sianeqqissaasi, taanna oqarpoq.

- Imaanngilarli tamarmik ataasinngorpat sianissasut, taanna oqarpoq.

Nakorsamit pinasuartumik ikiorneqarnissaq pisariaqartinneqarpat tamanna suli periarfissaasoq, taassuma erseqqissaatigaa.

- Taliiarsimallutit niuujarsimallutilluunniit takkukkuit suli ikiorsinnaavatsigit, taanna oqarpoq, peqqinnissaqarfillu suli maaniittoq erseqqissaatigalugu.

- Suli sulivugut, inunnullu ikiorneqarnissaminnik pisariaqartitsilluinnartunut ikiuinissamut piareersimalluta.

Nakorsap oqarasuaataa sianerfigineqarsinnaanngitsoq

Nuummili nakorsamut inniminniisarfiup oqarasuaataa 80 11 11 attavigalugu inniminniisoqarsinnaanngilaq, taannami qarasaasiatigut ingerlasuummat, Jesper Olesen nassuiaavoq nangillunilu:

- Nuummili nakorsiartarfiup ambulancellu oqarasuaataat sianerfigineqarsinnaajuaannarput.

- Tamanna nunatta sinnerani aamma atuuppoq. Peqqinnissaqarfiit oqarasuaataatigut pissarsiarineqarsinnaapput, taanna oqarpoq.

Nakorsiat journalii iserfigineqarsinnaanngitsut

Qarasaasiatigut ajutoorneq Jesper Olesenip oqarnera naapertorlugu qarasaasiatigut saassussisoqannginnissaanut illersuummi ajutooqqasoqarneranik pissuteqarsinnaavoq.

- Atortugut qarasaasiatigut ingerlasut tamarmik eqqugaapput.

Taassuma attaveqatigiinneq nakorsianullu tunngatillugu paasissutissanut tunngasut tamarmik qarasaasiatigut ingerlasuusut peqqinnissaqarfimmi sulisunit piffissami matumani iserfigineqarsinnaanngikkallartut taassuma nassuiaatigaa.

- Nakorsiat allattorsimaffiinut journaliinut isersinnaanngilagut, Jesper Olesen oqarpoq.

Tamanna peqqinnissaqarfimmi sulisut nakorsiat sunik nakorsaatitortarnerat imaluunniiit kingullermik nakorsiarnerannit qanoq allattoqarsimanersoq takusinnaanngilaat.

Ajornartorsiutaasup qaqugu aaqqinneqarnissaa ilisimanngikkaa

Ajornartorsiutaasup qaqugu aaqqinneqarnissaa Jesper Olesenip ilisimanngilaa.

Taassumali tamanna ilungersuullugu sulissutigineqartoq erseqqissaatigaa:

- Pisariaqarluinnarpoq. Ajornartorsiulli aaqqiivigineqarsinnaavoq, taanna oqarpoq.