Aasaanerani aqqusaartoq: Uppik Kangerlussuarmi takuneqarpoq
Sine Ejsing Kangerlussuarmi najugaqarpoq, naliginnaasumik umimmannik tuttunillu pinngortitamiikkaangami takusassarsiortarpoq.
Qanittumi allamik qaqutigoortumik timmissamik takusaqarpoq.
- unnukkut angutaatigalu biilerluta, angutaatiga orpikkat akornanni qaqortumik sulummik takusaqarluni oqarpoq. Assiliiviga tigoriarlugu, arriitsunnguamik qanilliartoratsigu, tingimmallu miiterinik qulinik ungasitsigumut mippoq. Qaqqamiit isigerujoorpaatigut.
Sine Ejsingip uppik isiginerani alutorsarpoq, angerlaramilli aatsaat paasivaa qaqutigoortuumik takusaqarsimallutik.
-Siullermik uppimmik issittormiumik takusimasoraluta isumaqarpugut, taava assit isigillualerlugit, paasilerpara uppik issittormiutut isikkoqanngitsoq. Nalunngisannut timmissanik ilisimasalimmut asseq nassiuppara aperalugulu sunaanersoq, paasilerparpullu uppik mosehornitut taajuutilik takusimallugu.
- Immikkuullarittumik nalaataqarsimalluta paasivara, maanimi uumasuunngilaq. Ukiumut ikittuaqqat takuneqartarput, naliginnaanerulluni kujataani takussallugu. Kangerlussuarmiinnera immikkuullarippoq. Sine Ejsing taama oqarpoq.
Sine Ejsingip oqaatigaa immikkuullarittumik misigisimasaqarsimalluni.
- Takullugu nuannerujussuarpoq. Tuttunik umimmannillu alakkaagatta, timmissamik qaqutikkut nalaanneqartartumik naammattuuivugut. Tassa nuanneq.
Tikilaartoq
Uppik mosehornitut taajuutilik nunatsinni piaqqiorsinnaanngilaq uumaannarsinnaananilu. Sine Ejsing ilumoorpoq oqarami ataasiakkaat ukiumut tikittartut.
Pinngortitaleriffimmi miluumasut timmissallu pillugit ilisimatusartuuneq Lars Witting, taama oqarpoq.
- ukiut tamangajaasa nunatsinnut tikittarpoq. Kitaaniissinnaavoq tunumilu. Tikilaarnera maani pineqarpoq, canadamiit, islandmiit skandinaviamiilluunniit tikissimasinnaavoq. Tikillatsiaannartarput, naliginnaasumik aasalernerani aasaaneranilu tikittarput, kisianni ukioq kaajallallugu takuneqarsinnaasarput.
Sivisuumik kangerlussuarmiinnissaa ilimagineqassanngitsoq, ilisimatusartuuneq oqarpoq.
- aqqusaalaaginnarunarpoq, paasilerumaarpaa nerisassaqarnani, narlumukaat, kikkaassullu mikisut nerisarisaramigit, taamaammat tingeqqilissajunnarsivoq.
