Utoqqalinersiat isumaqatigiinngissutaasut
Utoqqalinersiaqarsinnaanermut ukiut killigititat 66-inut aappaagu qaaffanneqartussaapput 2021-imilu 67-inut qaffanneqaqqittussaallutik. Ukiunillu qaffaaneq 67-inut unissanngitsoq, Demokraatit ukiortaami oqaaseqaatiminni oqariartuutigaat. Taakkumi 2024-imi 68-inut qaffakkusuppaat 2030-imilu 70-inut.
Naalakkersuisooqataasut Atassutip tamanna isumaqatiginngilaa:
- Taamatut soraarnerussutisiaqalertarnermut ukiutigut qaffaaniarneq naapertuutinngilaq, ingammik inuusuttut akornanni suliffissaaleqisoqartillugu, Atassutip siulittaasuata tullia Steen Lynge tusagassiuutinut nalunaarummi allappoq.
Aamma atuaruk Utoqqalinersianut inatsimmut nutaamut kommunit piareersimapput
Angutit ukiui agguaqatiigisikkaanni 68-iupput arnallu 72-iullutik. Ukiunut killigititanut qaffaaniarneq utoqqalinersiaqarsinnaatitaanermut periarfissamut naapertuutinngitsoq Atassut aamma isumaqarput.
Nunatsinni utoqqaat amerliartuinnartillugit atugaallu ajorseriassanngippata utoqqalinersisinnaanermut ukiut killigititat qaffanneqaqqittariaqartut Demokraatit isumaqarput.
Inuusuttut ilinniagaqartut amerlanerulersinnerisigut utoqqalinersianut anigaasartuutit matussuserneqassasut Atassut isumaqarpoq.
Aamma atuaruk Aaqqissuusseqqinnerup ileqqaagaqarnissaq pilerinarsisissavaa
Naalakkersuisooqataasut aappaat, tassa Siumut, Demokraatit oqariartuutaat aamma isumaqatiginngilaat.
- Isumaqarpunga Siumuminngaannit alloriarneq taanna pereertoq. Suliniutilli allat siunissami aallunneqartariaqartut nunatta aningaasarsiornerunissaanut periarfissiisut aammalu inuiaqatigiinni aaqqissuusseqqinnerit, soorlu akileraartarnikkut, sukkanerusumik aaqqissuunneqartariaqartut, Siumumit aningaasaqarnermut oqaaseqartartoq Jens Immanuelsen KNR-imut oqarpoq.
