Utoqqaat qilanaartut dronning takunngitsoorusunngikkaat
Naak ungasillisimaartariaqaraluarlutik alapernaallutik malinnaapput. Utoqqaat illuanni Unganartumi najugaqartut dronningip Ilulissanut ullup qeqqata kingorna tikinnera najuuffigerusuppaat.
Taamaammat Air Greenlandip timmisartuutaata minnissaa dronningillu niunissaa mittarfiup eqqaanut ungaluusat illuatungaannit malinnaaffigiartorpaat.
AAMMA ATUARUK Dronning nunatsinnut tikittoq
Utoqqaat Illuanni Unganartumi aqutsisoq, Rachel Reimer Jensen dronningimik takunninnissamut qilanaaqataavoq.
- Nuanneqaaq, tassa aamma 2015-imi demenscenteri atoqqaarfissiornerani atatillugu uigigaluanilu maaniinnikuugami. Utoqqaat tamaasa taamanikkut tikillugit ilassiornikuugamigit. Aamma taakku peqqutaapput utoqqaat, uagullumi aamma tamatta pingaartitarigatsigit dronningeqarneq kunngeqarnerlu, taamaattumik uagutsinnut isumalerujussuuvoq tikinnerani maannga aalateriartussalluta Ilulissanullu tikilluaqqullugu, utoqqarmiuni aqutsisoq KNR-imut oqarpoq.
Utoqqaat takkullutik ataqqinninnertik dronningimut aamma takutikkusukkaat, taanna nassuiaavoq.
- Tassa taanna Dronningimut ataqqinninneq, aammalu taakkua Kalaallit Nunaat uummateqarfigigamikku, taamaattumik aamma sungiussisimasut utoqqaat ilitsoqqussariinnarpaat kunngeqarfinnut ataqqinnillutik, taamaattumik pingaaruteqarsimasorujuuvoq, aamma ullumikkut ulloq nuannernermut. Aputeqanngilaq, silaannarissaatigaluta aniiutigaluta tikilluqqusiartornerput, Rachel Reimer Jensen oqarpoq.
Louisep dronningi takunngitsooraa
Tamarmillu takunninnissaminnut iluatsitsinngillat. Louise Lukassenip utoqqariuni najugaqartup dronning Margrethe takunngitsoorpaa.
Louise Lukassen, Utoqqaat Illuanni Unganartumi najugaqarpoq
- Suli takunnginnakku pikkunaappaluppoq.
Suli maani Ilulissaniippoq. Takuniarlugu arlaannukarniarpit?
- Ikiortissaqaruma.
Takunissaa qanoq pingaartitsigaajuk?
- Nuannertaqigami takullugu, Louise Lukassen kunngikkormiunut ukiorpassuarni malinnaasoq oqarpoq.
- Assiinnaatigut takusaraluarpara
Justine Vetterlainilli dronningip takullatsiarpaa.
- Takutsiarpara biilini tunuaniittoq.
Dronningip takunera ilinnut qanoq pingaaruteqartigiva?
- Nuannertorujuuvoq. Toqqissiallannarpoq aamma qamuuna takoqqillugu. Assiinnaatigut takusarakku.
Sooruna eqqissisisutit?
- Tassa illersortarmatigut.
Dronningip illoqarfigisannut Ilulissanut tikeraarnera ilinnut qanoq pingaartigiva?
- Nuannertorujuuvoq, pingaartorujuuvoq.
Biilinik saneqquteqqammerpoq. Takugakku qanoq misigisimavit?
- Eqqarsaateqanngilangaluunniit nuannaarnermut.
Dronningip nunarput oktobarip ulluisa arfineq-pingajuannit aqqaneq-aappaanut tikeraassavaa. Dronningip tikeraarnerani pilersaarutit uani atuarsinnaavatit.
