Utoqqaat napparsimanngikkaluarlutik napparsimmavimmi inissisimatinneqartut
87-inik ukiulik Per Petersen napparsimanngikkaluarluni Maniitsumi ukioq ataaseq napparsimmavimmiitsitaavoq.
Per Petersen napparsimmavimmi uninngareernermini Maniitsumi utoqqaat illuanni Neriusaamut inissinneqarsimasussaassagaluarpoq, tassanili inissaalatsitsimmata angerlarsimaffimminiiginnarsinnaannginnamilu napparsimmavimmiitsitaavoq.
79-inik ukiulik Helene Berthelsen Per Petersenitulli sivisuumik, tassa qaammatini qulingiluani, aamma napparsimmavimmiitsitaavoq.
Utoqqaat taakkua marluk mapparsimmavimmiitsitaanerisa ajornartorsiutaanera arajutsisimanngikkini, Qeqqata Kommuniata isumaginninnermi pisortaa Paneeraq Olsen oqarpoq. Paaqqineqartariaaqimmatali angerlartiinnarneqarsinnaanngitsut ilanngullugu erseqqissaatigaa.
- Utoqqaat illuannut inissinneqarsimasussaassagaluarput, tassanili inissaalatsitsimmata paaqqineqartariaaqimmatalu angerlartiinnarneqarsinnaanngimmata inissarsineqarnissaasa tungaanut napparsimmavimmiitsittariaqarpagut, isumaginninnermi pisortaq oqarpoq.
Utoqqaat illuannili init atortissinnaanngitsortaqarput, tamannali najugallit katitigaanerisa aaqqissugaanerannik pissuteqartoq, isumaginninnermi pisortaq oqarpoq:
- Assersuutigalugu utoqqaat illuanni najugallit tarnikkut napparsimasortaqaraangata taakkua sakkortuumik qisuariarsinnaasarmata saniliani ini atortissinnaasanngilarput.
Init taakkua atortikkaanni tassani najugallit allat toqqissillutik inuunissaannut isumannassasoq, Paneeraq Olsen erseqqissaavoq.
Utoqqaat marluk taakkua napparsimmavimmiitsitaagamik utoqqaat illuannisulli sammisassaqartitaasannginnamik, ilaquttaminnik pulaartoqanngikkaangamik kiserliortarput.
- Kiserliortaqaanga, aamma napparsimasunik allaallumi peruluttunik ilaanni ineqateqartariaqartarpunga, Helene Berthelsen tussunngorpaloqaluni oqarpoq.
Qaqutikkut aneertartoq
- Panimma aneeruttartorujussuuaanga. Taava napparsimmavimminngaanniit ataasiaannarluni portørit ilaata aneeruppaanga, Helene Berthelsen oqarpoq.
Helene Berthelsen napparsimmavimmi inissisimatitaanermini aneerunneqartarpoq. Per Petersenili ataasiarluniluunniit aneerunneqarsimanngitsoq, nulia 80-inik ukiulik Sara Petersen oqarpoq.
- Uiga napparsimmavimmi inissisimatitaaleramili ineqateqanngivippoq ikiortarialiullunilu, napparsimmavimmili sulisussaalatsigamik sianerfigisarpaannga aperalunga isumagiartorsinnaaneriga, Sara Petersen oqarpoq.
Kommuni qisuarianngitsoq
Utoqqaat taakkua marluk ilaqutaat Qeqqata Kommunianut Naalagaaffiup Sinniisuanullu naammagittaalliuteqarput, naammagittaalliutaalli akineqanngittuarsinnareerlutik qanittut aatsaat akineqarput. Tamannali itinerusumik allaatigisap massuma naggataani uterfigissavarput.
Helene Berthelsenip Per Petersenillu napparsimmavimmi inissisimatitaanerat pillugu ilaqutaasa naammagittaalliuteqarneranniit ullut ingerlapput, qaquguli napparsimmavimmiitsitaajunnaarnissaannik akineqanngittuarsinnarput.
- Nuanniittarpoq nuannertarlunilu. Soorlu sungiutiinnariga, soorlu immaqa utoqqaat illuanniillunga. Aamma neqeroorfigineqannginnatta utoqqaat illuannut peqqulluta, tassani inissaqartinnata napparsimmavimmiittuartussaagama, Helene Berthelsen oqarpoq.
- Inummik immikkut paarsisoqalaarnissara eqqarsaatigisaraluarpara. Uanga ajukkutiasarama napparsimmavimmilu sulisut ulapputtarmata atukkakka tamaasa naammagalugit, Helene Berthelsen oqarpoq.
Utoqqaat taakkua marluk taama sivisutigisumik napparsimmavimmiitsitaanerat utoqqaat illuata sulisussaalatsineranik tassanilu sulisut ilinniarsimasuunngitsortaqarnerannik pissuteqartoq, Paneeraq Olsen oqarpoq.
- Taamaammat aamma paaqqutarisarialinnik ulloq unnuarlu paaqqinnittussalerlugit isumaginissaannut akissaalatsigatta angerlartitseriaannaasanngilagut.
Suliaq naammassisoq
Qeqqata Kommuniata utoqqaat taakkua marluk ilaqutaasa naammagittaalliutaannut akissutaa maanna uterfigissavarput. Tassa Helene Berthelsenip pania, Sørine Berthelsen, arni Per Petersenilu qanoq atugarnersut facebookimi allaqqammiinnartoq, Qeqqata Kommunia Maniitsumi innuttaasunik utoqqaat illuannut inissinneqarnissamut utaqqisunik ataatsimiigiaqqusivoq.
Qeqqata Kommuniata tamatumunnga naliliisartoqatigiivisa Helene Berthelsenip Per Petersenillu utoqqaat illuannut inissinneqarnissaat ataatsimiissutigereerpaat. Tassa Per Petersen Helene Berthelsenilu Neriusaami inissarsineqarput, Per Petersenili pisut ingerlaneranni napparsimalersimalluni unitsitaagami suli napparsimmavimmiippoq.
Helene Berthelsenili utoqqaat illuannut juunip sisamaani nuuppoq. Taannalu nuunngitsinarmini ima oqarpoq:
- Utoqqaat illuanni ilisarisimasarpassuaqarama akuliuffiginissaannut qilanaarpunga.
Napparsimmavimmiititsisarneq akisusoq, isumaginninnermi pisortaq oqarpoq. Tassa paaqqutarisaliunngitsumik ulloq unnuarlu napparsimmavimmiititsineq 2.400 koruuneqarpoq, paaqqutarisalioqisunullu 6.000 koruuneqarluni.
- Paaqqutarisarialinnik napparsimmavimmiititsisariaqartarnerput akisummat sapinngisamik ingalassimaniartarparput, utoqqaalli illuanni inissarsisinnaanngikkaangatsigit allatullu iliorsinnaanngikkaangatta taamaaliortariaqartarpugut.
Taamaammat kommuni ilinniarsimasunik atorfinitsitsiniarnermik sulisunillu pikkorissaanermik ilinniartitsinermillu ukkatarinningaatsiarpoq.
- Taamaaliorpugut utoqqartavut sapinngisamik sulilluarumallugit paaqqinnittussaqartilluarumallugillu.
