Utoqqaat illersuisuat utoqqaat pillugit periusissiaq pillugu: Inortuereerpugut

Utoqqaat illersuisuata naalakkersuisut nutaamik periusissiaqarlutik suliassaqarfimmik ukkatarinnilernerat nuannaarutigaa, aaqqitassarpassuarnilli ajornartorsiuteqarnerarlugu.

Allattoq Hanna Vestergaard Hviid

marsip 02-at 2023 10:03

Nutserisoq Connie Fontain

- Kalaallit Nunaanni utoqqarnik paaqqutarinninneq amigaatilerujussuuvoq.

Naalakkersuisut utoqqaat pillugit periusissiartik nutaaq ’Utoqqaaneq pitsaasoq – periarfissat, atugarissaarneq siunissarlu nukittunerusoq’ ataasinngornermi saqqummiutereeraallu, Utoqqaat illersuisuat, Inga Egede tusagassiuutinut nalunaarummi taama allappoq.

Inga Egedep suliniutit nutaat qulit, utoqqarnut suliassaqarfimmi utoqqaat inuunerinnerulernissaannut pilersitsinissamik siunertaqarlutik, aalajangerneqartut nuannaarutigigaluarpai.

Aamma atuarukNaalakkersuisut utoqqaat pillugit periusissiaq nutaaq saqqummiukkaat: Pilersuisussaatitaaneq atorunnaarsinniarparput

Suliniutilli nutaat piviusunngortinneqannginneranni aaqqiivigineqartariaqartorpassuarnik ajornartorsiuteqarsoraa.

- Naalakkersuisut anguniagaraat; “periusissiami oqaasertaliorneq suliniutillu piffissaq eqqorlugu takutinneqarnissaat inuiaqatigiinnilu naleqqussaanernut pisariaqartunut iluaqutaassallutik. Ajoraluartumik oqartariaqarpunga; inortuereerpugut, Inga Egede oqarpoq.

Taassuma utoqqaat illui paaqqutarinniffiunerulerlutik nalinginnaasumik utoqqaat ikinnerulersimasut ilaatigut allappaa.

- Puiortunngortut, utoqqaat timikkut tarnikkullu nappaatillit, toqujartortut napparsimmavinni paaqqutarineqartussaagaluit aammalu nalinginnaasumik utoqqaliartortut akulerussuullugit utoqqaat illuini najugaqartinneqarmata nunatsinni utoqqaat illui paaqqutarinnittarfinngornikuupput.

Taassuma naalakkersuisut utoqqaat najugaqatigiiffiinik pilersitsinissamik pilersaaruteqarnerat qutsatigaa, taamaaliornikkullu utoqqaliartortut nalinginnaasumik pineqarnissaattulli salliullugit iliuuseqarfigineqarnissaat neriuutigalugu.

Utoqqaat amerliartortut

Naalakkersuisut utoqqaat pillugit periusissiaat nutaaq inuiaqatigiinni ukiuni tulliuttuni allanngungaatsiartoqartussaanera pissutigalugu suliarineqarpoq. Utoqqaat amerlaneruleriartuinnarput, tamannalu ilutigalugu sulisut ikiliartuinnassapput.

Nunatsinni utoqqaat ukiut qulit ingerlaneranni tassa 2020-mit 2030-mut utoqqarnut tunngasunik sulisunit 2.063-init amerlanerulerumaartut periusissiami allassimavoq.

’UTOQQAANEQ PITSAASOQ – PERIARFISSAT, ATUGARISSAARNEQ SIUNISSARLU NUKITTUNERUSOQ’

Periusissiaq naalakkersuisunit februaarip 23-anni sisamanngornermi akuerineqarpoq.

Periusissiaq nutaaq innuttaasut utoqqaat inuunermik atugaannik pitsaassusaanillu pitsanngorsaanissamik siunertaqarpoq. Tamatuma saniatigut inuiaqatigiit aningaasaqarneranut pitsanngorsaataassaaq.

Periusissiaq kommunit, naalakkersuisoqarfiit, peqqinnissaqarfik allallu suleqatigiinnerisa inerneraat.

Periusissiaq utoqqarnut suliassaqarfinnut pitsanngorsaanissamik qulinik siunertaqartunik suliniutitaqarpoq.

Utoqqaat pillugit suliassaqarfimmut inatsit ataatsimoortoq

Utoqqarnik sullissinermik aaqqissuusseqqinneq pillugu suleqatigiissitaq

Utoqqalinersiaqarnermik aaqqissuusseqqinneq

Pilersuisussaatitaanermik atorunnaarsitsineq (Utoqqalinersiaqarnermik aaqqissuusseqqinnerup ilaa)

Utoqqalinersiuteqalernissamut ukiorititat naleqqersuusiornerat

Utoqqaat illuini puiguttortunut immikkoortortanut aningaasat

Suliamut attuumassuteqartunut qanigisaasunullu puiguttorneq pillugu paasisitsiniaaneq

Peqqissaanermik ikiortitut piginnaasaviit naliliivigineqarnerat tunngavigalugit ilinniartitaanermi piumasaqaatinik allannguuteqarneq kiisalu najugarisaq qimannagu ilinniartitaaneq pillugu neqerooruteqarneq

Utoqqaat najugaqatigiiffiinik pilersitsinissamut aningaasat

Utoqqaat illuini sammisassaqartitsinermut kalaalinernullu aningaasat

Paasissutissarsiffik: Naalakkersuisut utoqqaat pillugit periusissiaat: Utoqqaaneq pitsaasoq – periarfissat, atugarissaarneq siunissarlu nukittunerusoq

Allisiguk

Inga Egedelli utoqqarnut suliassaqarfimmi sulisussat amigaataangaatsiareernerat ajornartorsiutaareersoraa.

- Utoqqaat illuini aammalu angerlarsimaffimmi ikiorteqarnermi sulisussaaleqisoqaqaaq, tamatumani kommunit ataasiakkaat aningaasatigut sipaarniarnerannik, sulisussaaleqinermik aammalu sulisut akornanni napparsimasoqartarneranik peqquteqarpoq. Taamaammat sulisut kiserngoruttut utoqqarnut eqquisumik qimunnerusalersarput, utoqqaat illersuisuat oqarpoq, nangillunilu:

Taamaammat Naalakkersuisut suliniutissaasa aallartinneqannginneranni ajornartorsiutinik maannangaaq aaqqinneqartariaqartunik ulikkaareerpoq.