Utoqqaat Illersuisuat tunuartoq
Naalakkersuisut utoqqaat pillugit oqaaseqartartussamik nutaamik aasap ingerlanerani toqqaanissaannut paasissutissaq nal. 13.20 ilanngunneqarpoq.
Ukiut marluk.
Inga Egede taama sivisutigisumi utoqqarnut illersuisuuvoq. Tunuarniarninili KNR-imut uppernarsarpaa.
Inga Egedep tunuarnini sumik pissuteqarnersoq oqaaseqarfigerusunnagulu nassuiaateqarfigerusunngilaa.
Ajuusaarutigeqaara sullitakka sullissinnaajunnaarakkit, Inga Egede utoqqarnut illersuisuujunnaartussanngorami Facebookimini taama allappoq.
Utoqqaat illersuisuat ukiut pingasukkaarlugit toqqarneqartarpoq. Utoqqarnut illersisuusimasoq Helene Heilmann aamma tunuajaarpoq, taanna ukiumi ataatsimi utoqqarnut illersuisuuvoq.
Inga Egede utoqqaat atugaat pillugit isornartorsiuisareerpoq. Naalakkersuisut utoqqaat pillugit periusissiaat marsimi saqqummiunneqartoq ima oqaaseqarfigaa:
- Naalakkersuisut anguniagaraat; “periusissiami oqaasertaliorneq suliniutillu piffissaq eqqorlugu takutinneqarnissaat inuiaqatigiinnilu naleqqussaanernut pisariaqartunut iluaqutaassallutik. Ajoraluartumik oqartariaqarpunga; inortuereerpugut, nunatsinni utoqqarnut sullissineq amigaralugu Inga Egede taamani oqarpoq.
Inga Egede utoqqaat illersuisuattut juulip aallaqqaataani suliunnaartoq Isumaginninnermut, Suliffeqarnermut Nunamullu Namminermut Naalakkersuisoqarfik tusagassiorfinnut nalunaarpoq.
Naalakkersuisut utoqqaat pillugit oqaaseqartussamik nutaamik aasap ingerlanerani toqqaassasut nalunaarutigineqarpoq. Inga Egedep suliunnaarnera Naalakkersuisut oqaaseqarfigisinnaanngilaat, suleqatigiinnerulli taamaatinnera illua’tungeriiulluni paaseqatigiiffiusoq ilanngullugu ilisimatitsissutigineqarpoq.
