Utoqqaat angerlarsimaffiini ikiuinissamut ajornartoornermi upalungaarsimaneq aallartinneqartoq

Nuummi utoqqarnut ikiortit amigaataapput. Taamaammat Kommuneqarfik Sermersooq ajornartoornermi upalungaarsimanermik aallartitsivoq.

Sofie Lund Nuummi angerlarsimaffinni ikiorteqarnissamik pisariaqartitsigut 269-iusut ilagaat.

Sofie aanaartornermi kingorna nangiartalernikuunini peqqutigalugu angerlarsimaffimmini makku ilaatigut pisariaqartittarpai: asaaneq, eqqagassalerineq alersilerneqarlerlu.

- 2011-mili ikiorteqalerpunga. Massakkumut allaat, Sanamiittarlungalu OBS-imittarlungalu. Pisunnerlu ajulernikuungaluarlunga, tamaviaartorujuullunga pisuttalernikuuvunga, taanna oqarpoq.

Taassuma qaammatini pingasungajanni ikiorteqarsimanani oqaatigaa.

- Ajornartorujussuuvoq. Naalliunnaqaaq 

Pissutsit ilungersunartut

Kommuneqarfik Sermersuup pissutsit maannakkut ilungersunarnerat oqaatigaa.

Ingerlatsivimmi pisortaq, Karen Lund Mølgaard taama oqarpoq.

- Nuummi angerlarsimaffimmi killiffipput imaannaanngitsuuvoq. Sulisut amigarput sulisut massakkut nødrute ingerlattariaqalersimavaat, assassaaleqineq peqqutigalugu. 

Karen Lund Mølgaard er forvaltningschef for ældreområdet i Kommuneqarfik Sermersooq. Hun fortæller, at man lige nu gør brug af vikarbureauer, indtil der forhåbentligt er ansat flere efter marts. Assi © : KNR

Illoqarfiit pingaarnersaanni angerlarsimmi ikiortit katillugit qulingiluat amigaatigineqarput. Utoqqaat ikiorneqarnissamik pisariaqartitsisut amerlanerulerneranut pissutsit qanoq aallartissimanersut Karen Lund Mølgaard aperineqarami ima oqarpoq:

- Ukua sulisut amingarneri peqqutaasinnaapput ukua sullitat amerlipiloorneri taavalu sulisussaaleqineq taakkua oqimaaqatigiinnginnerat suliassat iluani oqimaallinikuunerat taanna maluginikuuarput, sulisussanik uani amingaateqarnerulerneq.

Tassa ilaatigut nakorsaatinik pisariaqartitsisut, isumaginninnermi oqimaannerusunik ikiorneqarnissamut pisariaqartitsisut aamma nerisassanik assigisaanillu pajuttuineq.

Aaqqiissutissat

Kommunip innuttaasut pisariaqartitaat naammassisinnaaniarlugit vikarbureau ilaatigut atorpaa.

Taakkuli periarfissaanerat aamma killeqartoq, Karen Lund Mølgaardip oqaatigaa.

Taamaammat kommunip utoqqarnut qanigisaasut sapinngisaminnik ikiuuteqqullugit aamma kaammattuuteqarpoq.

Ajornartoornermi upalungaarsimaneq marsip tungaanut atuunnissaa naatsorsuutigineqarpoq.

Kingorna susoqassava?

- Marsip tungaanut ingerlaniarput, marsip kingorna naatsorsuutigaarput uani atorfiit inuttalereerneqarsinnaaneri, Karen Lund Mølgaard naggasiivoq.