- Atuarnerani pakatsivugut aamma tamatta gruppitsinni misigaluta uagutsinnut tunngasoq aasiit kinguarsaqqinneqartoq pakatsissutigivarput.

Spiralilerneqarsimanermik naammagittaalliuteqartut 300-nit ikinnerunngitsut spiralilersuisimanermik qulaajaanermut ilanngussisut ilaat Arnaq Johansen taama oqarpoq.

Ilisimatusartoqatigiit qulaajaanerminni killiffitsik pillugu ataasinngornermi nalunaaruteqareersullu taanna taama oqarpoq.

Allagaatinik Peqqinnissaqarfimmit pissarsisinnaannginneq qulaajaanermik kinguaattoortitsisinnaasoq amigartumillu qulaajaanermik kinguneqarsinnaasoq, ilisimatusartoqatigiit nalunaarumminni ilaatigut oqaatigaat.

Ajornartorsiutip aaqqiivigineqarnissaa naligiissitaanermut naalakkersuisup qulaajaanermi aamma ataqatigiissaarisuusup KNR-imut neriorsuutiginerareeraluaraa, ajornartorsiut akimmisaarutaassanngitsoq neriuutigigini Arnaq Johansen oqarpoq:

- Soorunami utersaartutut misinnarpoq uagutsinnut tunngasut pappiaqqat sukataarutiginikuullugit, ujarnikuullugit taavalu allaninngaanniit aamma atorfissaqartinneqaraluarlutik tiguneqarsinnaanngitsut. Soorunami pakatsinarpoq, neriulluarnikuugaluaratta qulaajaasut aqqutigalugit pappiaqqavut nassaarineqarsinnaassasut, taanna oqarpoq.

Tusaaneqanngitsutut misigisut

Arnallu taakkua nammineq misigisaminnik qulaajaasunut tusartitsinissamik periarfissinneqarsimanngitsortaqarput.

Tamanna aamma pakatsissutigigitsik, Arnaq Johansen oqarpoq:

- Siullermik una nalunaarusiap atuarnerani pakatsinitsinnut tunngaviuvoq Nakorsaaneqarfimmut naammagittaalliutigut tunniunnikuusagut, aamma atsiornikuugatta qulaajaasunut naammagittaalliuterput tunniussinnaagaat taavalu apersorneqarniassagatta, taanna oqarpoq nangillunilu:

- Kisianni paasillugu suli periarfissaqartoq, soorunami qujamasuppugut uagut nammineq misigisagut qulaajaasunut tusartikkusukkatsigit. Aamma nalunaarusiamiitikkusukkatsigit suut aqqusaarsimanerlugit.

Nukittunerujumallutik peqatigiiffinngorniartut

Spiralilersuisimanermilli qulaajaarnermi ajornartorsiutip aaqqiivigineqarnissaa neriorsuutigineqareeraluartoq nukittunerujumallutik peqatigiiffinngornissartik suliniutigalugu aallartikkitsik, Arnaq Johansen oqarpoq: 

- Tassa massakkut suliniutigalugu aallartipparput peqatigiiffinngornissarput nukittuneruniassagatta inuttut ataasiakkaatut suliunnaarluta. Tassa taanna massakkut aallartipparput misissorlugu qanoq iliorsinnaanerluta. Tassa massakkut avatangiisigut gruppeqatigut apersorpagut qanoq isumaqarnersut, taavalu amerlangaatsiartut nalunaareerput peqatigiiffinngornissarput kissaatigigaat. Taava tassanngaanniit aatsaat suliniutit aallartissavagut, taanna oqarpoq.

Qulaajaanerulli unittooqqanerata qanoq iliuuseqarfigineqarnissaanik nalunaarutigineqarnissaa naalaaqqaarniarpaat.

Sukkasuumik ingerlariaqqinnissamik qanoq iliorniarnersut aperigatsinni ima akivoq: 

- Tassa taanna akisinnaanngikkallarpara. Naalaaqqaartariaqarput, kisianni Nakorsaaneqarfimmut apeqqutilliinikuuvugut assigiinngitsunik taakku tunngavigalugit.