Polar Seafood Brexit pillugu: Utaqqiinnartariaqarpugut

Nunarput 680 millionit koruunit missaannik Tuluit Nunaannut nioqquteqartarami, akitsuusersuiffigineqarneq avammut niuernitsinnut eqquisorujussuussasoq, Polar Seafoodip siulersuisuisa siulittaasuat naliliivoq.

- Isumaqatigiissusiortoqassanngippat nioqqutigut tamarmik 20 procentinik akitsuuserneqarsinnaassasut ernumassutigilaarparput, Henrik Leth oqarpoq.

Raajaat uutat qalipaajakkallu Polar Seafoodip Tuluit Nunaannut nioqqutigisartagaasa 90 procentit missarimmassuk, taakkuninnga niuerneq ingerlatseqatigiiffimmut pingaaruteqartorujussuuvoq.

AAMMA ATUARUK Niueqatigiinneq pillugu isumaqatigiissuteqarnissaq Brexitip kingorna aatsaat pisinnaasoq

Taamaammat Tuluit Nunaat EU-mit marsip 29-ani aninnginnerani, illuatungeriit  isumaqatigiissuteqassasut Henrik Lethip neriuutigaa.

- Tuluit Nunaata matorluilluni aninissaa kissaatiginanngilaq, taamaattoqassappammi avammut niuernermut kinguneqaannarani, aamma nunarsuarmi tamarmi aningaasarsiornermut kinguneqassaaq, tamannalu tamatsinnut annerusumik kinguneqarsinnaavoq, Henrik Leth oqarpoq.

AAMMA ATUARUK Mayip siunnersuutaata itigartitsissutigineqarnera Naalakkersuisut tusaatissatut tiguaat

Tuluit Nunaata EU-mit anereernerani, nunarput niueqatigiinnissamik aatsaat isumaqatigiissusiorfigisinnaagaa, nunanut allanut tunngasunut naalakkersuisoq, Ane Lone Bagger KNR-imut siusinnerusukkut oqarpoq.
 
Taamaammat Polar Seafoodip siulersuisuini siulittaasoq naapertorlugu iliuuseqartoqarpallaarsinnaanngilaq.

- Tamanna sunniuteqarfigisinnaannginnatsigu utaqqiinnartariaqarpugut. Aliasukkutta kamakkuttaluunniit iluaqutaanavianngilaq, Polar Seafoodip siulersuisuini siulittaasoq, Henrik Leth oqarpoq.