Niueqatigiinneq pillugu isumaqatigiissuteqarnissaq Brexitip kingorna aatsaat pisinnaasoq
![](/sites/default/files/styles/image_934x467/public/article_images/bagger.jpg?itok=XS0VglDm)
Atorfilittalli aqqutigalugit oqaloqatigiittoqalereersoq, naalakkersuisup Ane Lone Baggerip oqaatigaa.
Nunarput Tuluit Nunaannut ukiumut 680 millionit koruunit nalinginut ukiumut niueqateqartarpoq.
- Illugiilluni niueqatigiinnissamut oqaloqatigiinnerit siornali aallartipput, taakkulu maanna aamma annertusarniarneqalerput, Nunanut allanut tunngasunut naalakkersuisoq Ane Lone Bagger oqarpoq.
AAMMA ATUARUK Mayip naalakkersuisuilu tatiginnikkunnaarnermik taasineq anigorpaat
Savalimmiormiut Tuluit Nunaannik isumaqatigiissusioreersut qanittukkut nalunaarutigineqarpoq, isumaqatigiissullu atsioriaannanngoreersoq aamma oqaatigineqarluni.
Savalimmiormiulli Tuluit Nunaannik isumaqatigiissuteqareernerat pissutaalluni nutaamik isumaqatigiissusiortoqarsinnaasimavoq:
- Uatsinnut tunngatillugu pissutsit imminnut ilarussuunnerupput. Nunatta EU-mik niueqateqarnissamut isumaqatigiissutaani inatsisit tassunga attuumassuteqartut amerlapput. Nunatta 1985-imi niueqatigiinnissamik isumaqatigiissummik aalajangersagaa, aalisarneq pillugu EU-p Nunattalu isumaqatigiissutaat, OLT-lu matumani pineqarput. Taamaattumik taakkua assiliinnarlugit niueqatigiinnissamut isumaqatigiissusiorsinnaanngilagut, Ane Lone Bagger oqarpoq.
AAMMA ATUARUK Mayip EU-mut ilaasortaajunnaarnissaq pillugu isumaqatigiissusiaa itigartitsissutigineqarpoq
Nunatta Tuluillu Nunaata akornanni killilersugaanngitsumik niueqatigiinnissamut nutamik taamaammat isumaqatigiissusiortoqartariaqassaaq, tuluillu EU-mi aatsaat ilaasortaajunnaareerpata tamanna pisinnaassaaq.
Naallu tuluit EU-mi marsip 29-ani ilaasortaajunnaarpata aatsaat isumaqatigiissusiortoqarsinnaagaluartoq, naalakkersuisoq isumalluarpoq, isumaqatigiissulli qaqugu atsiorneqarsinnaassanersoq oqaatigisinnaanngikkallarlugu:
- Isumaqatiginninniarnerit takutikkumaarpaat, oqaloqatigiinnerillu siulliit aallartereerput. Tuluilli inatsisartuini taasisoqareernerup kingorna isumaqatiginninniarnerit annertusarneqartut oqaatigisinnaavara, Nunanut allanut tunnganut naalakkersuisoq Ane Lone Bagger oqarpoq.
AAMMA ATUARUK Theresa Mayip tatiginnikkunnaarnermik taasititsivigineqarnini anigoraa