Naja Lyberth spiralerneqarsimanerminik sapiissuseqarluni oqaluttuaqqaartuuvoq.

14-inik ukioqarluni Maniitsup nakorsiartarfiani nallangavimmiilluni 1976-imi spiralilerneqarneq. Aalajangerneq taanna nammineq aalajangigarinngilaa.

Maniitsumi taamani nunap immikkoortuani nakorsap Naja Lyberth atuaqataanilu niviarsiaqqat napparsimmavimmut spiralilerneqarnissaannik nalunaarfigisimagai, taanna oqarpoq.

Taassumalu tamatuma kingorna sooq spiralilerneqartariaqarnini akissutissarsiniarsimavaa. Akissullu taanna takkutingajalerpoq, spiralilersuisoqarsimanerami pillugu qulaajaaneq aallartippoq.

- Kinguaariippassuit spiralilersuisoqarnerata kingunerani annaavagut. Sivisuumik utaqqinikuuvugut, soorlu spiralilersuisoqarsimanersoq akissuterserusupparput, 60-inik ukiulik, Naja Lyberth oqarpoq.

Qaammaterpaalunni utaqqisut

Spiralit DR-ip kalaallit niviarsiaqqat arnallu tusindilikkaat 1966-imit 1970-ikkunnut danskit kalaallit innuttaasut amerliartornerannut annikilliiniarlutik periusaanut atatillugu spiralilersorneqarsimaneranik siorna saqqummiussinerani oqallisaalerput.

Tamatuma kingorna arnat arlallit akuersissuteqaratik angajoqqaatilluunniit akuersissuteqanngitsut spiralilerneqarnerminnik kingunerluutaasumik saqqummiussipput.

Naalakkersuisut danskillu naalakkersuisuisa spiralilersuisoqarsimanerata qulaajarneqarnissaa siorna septembarimi isumaqatigiissutigaat.

Maannalu qaammatit arfineq-pingasut qaangiuttut spiralilersuisoqarsimanerata nakerisarsiunngitsumik qulaajarneqarnissaa aallartippoq.

Suliaqarnissaq taanna Naja Lyberthip sivisuumik utaqqisimavaa.

- Utoqqaliartorpugut. Arnat siulliit spiralilersorneqarsimasut 1940-kkunni inunngorinkuupput, taanna oqarpoq.

Spiralit Lippes Loop-inik taaguuteqartut kalaallinut arnanut niviarsiaqqanullu 1960-ikkunni 70-ikkunnilu ikkussorneqarput. Spiralit taakku ullumikkut ilisimasatsinnit anginerungaatsiarlutillu arnanut meerartaareersimasunut naatsorsuussaapput. Assi © : DR

Maanna allaanerusumik iliuuseqassaagut

Naja Lyberth arnanut spiralilerneqarsimasut ilaannit 140-nit ullumikkut oqaaseqartartuuvoq.

Taakku utaqqinertik danskit naalagaaffiannit taarsiiffigineqarnissamik suliamik aallartitsinissamut atorpaat.

Eqimattat eqqartuussissuserisut suliffeqarfianit Ehmer Pramming Advokaterinit sulissunneqarput. Taarsiiffigineqarnissamulli piumasaqaateqarneq qaammatialuit qaangiuppata aatsaat nassiunneqassasoq, eqimattat eqqartuussissuserisuat, Mads Pramming KNR-imut pingasunngornermi oqarpoq.

Utaqqinermi suliap politikkikkut pingaarutinneqannginneranut takussutissaasoq, Naja Lyberth isumaqarpoq.

- Tamanna suliap pingaaruteqarpiartinneqannginneranut uatsinnut takussutissaavoq. Utaqqeqqinnianngilagut, kisianni aallartilernera nuannaarutigaarput. Kisianni allaanerusumik maanna iliuuseqalerpugut, qulaajaasoqarnissaalu utaqqiunnaarlugu, taanna oqarpoq.

Qaqqap qaaniittoq

Naja Lyberthip spirali pillugu oqaluttuaqqaarneranit pisoqarnikooqaaq.

Naja Lyberthip niviarsiaqqallu allat atuaqataasa akornanni spirali 1976-imi oqaluuserineqartanngitsoq taassuma oqaluttuaaa ullumikkut nuna tamakkerlugu ilisimaneqarpoq.

- Soorlu qaqqarsuarmut majuarnikuulluni. Maanna qaaniippugut, maannalu iliuuseqarluta aallartissinnaavugut. Eqqartuussissuserisussarsivugut, qulaajaanerlu aallartinneqarpoq. Tassannga susoqarnissaa takussavarput, taanna oqarpoq.

Qulaajaaneq 2025-mi maajimi naammassissangatinneqarpoq.

Qulaajaanermi oqaluttuarisaanermi naartuveersaartitsisoqarnera 1960-ikkunni aallartinneqartoq spiralilersuinermillu periuseqalernermut aalajangiineq ilaatigut misissorneqassapput.