Akerliuneq: Erfalasumik ingerlatserusuttoqarpat Jens Kjeldsenip tunniukkusukkaa
Jens Kjeldsenip nuliani Dorthe Hegelund Kjeldsen peqatigalugu nunarsuarmik 2017-imi aallartillutik kaajallaaniarnertik ilisimaneqaatigingaatsiarpaa. Tassani Sullualukkoorput, Jens Kjeldsenilu Poorskimi qeqertarsiamut siunnerfeqarluni imarpiit ukiut sisamat matuma siorna angalaffigeqqippai.
Jens Kjeldsenilu nunamiilerluni Amerikamiut aallartitaqarfiata saavani akerliussutimik sapaatip-akunnerani matumani takutitsivoq.
Ullaat tamaasa taamaaliortarpoq, umiatsiamilu erfalasua nassartarpaa. Eqqornerusumilluunniit: Erfalasulerfiup aappaani pingasunik erfalasoqarpoq – tassa Erfalasorput, danskit erfalasuat Savalimmiullu erfalasuat. Aappaanilu Europamit erfalasui arlallit ikkusimapput.
- Ajortussaasinnaasoq pinaveersaarneqartussaassappat, taava qanoq iliuuseqartariaqassaagut massakkut, KNR-imut oqarpoq.
- Neriuppunga uagut manna pigigatsigu asagatsigu tassa taamaaginnassasoq kiffaanngissuserput tigummiinnarlugu.
Aallartitaqarfiup saavani kisimiilluni ataasinngornermi ullaakkut nalunaaqutaq qulingiluanut aallartippoq.
- Taava aqaguani tassa sociale mediakkoortinneqarsimasoq nalunanngilaq, tusagassiortut 20-t maaniipput tassa apersuillattaasarput taakku, taanna oqaluttuarpoq.
- Europamiut massakkut tapersersorpaatigut aamma tapersersormatigut qujassuteqangaartorujussuuvugut.
Kangerup oqaluffianut uteqqissasoq
Aallartitaqarfiup saavaniinnera sapaatiuppat unissaaq. Tassami Kangermi oqaluffiup nutarternera nangikkiartorlugu ataasinngorpat aallassaaq. Amerikap aallartitaqarfiata saavani erfalasulisaarusussinnaasunut allanut erseqqissumik kajumissaaruteqarpoq:
- Allat paarlanniarpannga takanna una erfalasoq tigummiinnarsinnaavaa, Naalagaaffeqatigiit erfalasui pingasut qiviarlugit oqarpoq.
Trumpi tikikkaluarpat qanoq oqarfigissagaluarpiuk?
- Isigisinnaanngilluinnarpara. Kisianni ima suaaruteqassagaluarpunga: “Trumpersuaq ningorit asiginnarpatsigit, Trumpersuaq ningorit go to hell with all your shit!”
Jens Kjeldsen akerliussutsimik takutitsisumik allamik ilaqalerpoq - tassa Nina Kreutzmann Jørgensen.
- Tapersersornissaa ajornaatsuararsuummat. Ulluinnarni suliffimmiit nalunaaquttap-akunnera ataaseq anilaarluni Jensi tapersersoriartornissaa ajornanngimmat, taanna oqarpoq.
- Erfalasut inunnillu tapersersuisunik peqateqarneq pingaarutilimmik oqariartuutaasoq isumaqarpunga. Taamaattumik Jensip iliuusaa nunarsuarmut tusarliussassamik ingerlatitseqqiinermut periarfissiivoq pitsaalluinnartoq. Tamannalu tapersersorpara.
