Usisaatip pisortaata eqqartuussut suliassanngorteqqinnianngikkaa: Taama pisoqarsimasussaanngikkaluarpoq

Angutip 64-inik ukiullip sulitilluni ajunaarnera pillugu eqqartuussut januaarip 22-ani naammassineqarpoq.

Ajutoorneq nutserisut suliffeqarfiata, Usisaatip quersuani 2022-mi septembarimi pivoq – suliffeqarfillu Eqqartuussisoqarfik Sermersuumit 40.000 koruuninik akiligassinneqarluni eqqartuunneqarpoq.

Usisaatip eqqartuussut suliassanngorteqqinnianngilaa – suliarlu taamaalilluni naammassivoq, pisortaq, Kenneth Jahn Andersen KNR-imut oqarpoq.

- Isumaqarpunga amerlasuunut pitsaalluinnartuusoq. Ajunaartorlu maani suliffeqarfimmi, amerlasuunit ilisimaneqarami tamanna sulisutsinnut sakkortuumik eqquinikuuvoq. Qanigisaasullu aamma eqqarsaatigaakka.

Sulisoq sulinermini ajunaartoq quersuarmi ilioraavinnit tigusiniarluni karsi nammineq sanaajusoq atorlugu gaffeltruckinik kivinneqarsimasoq misissueqqissaarnermi paasineqarpoq. Politiit oqarnerat naapertorlugu ajunaartoq ujatsiutaasaqarsimanngilaq, niaqumut illersuuteqarsimanngilaq allanillu isumannaallisaanermi atortoqarsimanani.

- Taama pisoqartussaanngikkaluarpoq. Karsi atorneqartoq karsinik mikisunik nuutsiniarnermut atorneqartussatut sanaajuvoq. Taamaammat tassani suliaqarnermi sooq atorneqarsimanersoq maani paasineqarsinnaanngilaq, Ajoraluartumik, Kenneth Jahn Andersen oqarpoq.

- Imaanngilaq akisussaaffimmik akisussaarusunngitsunga. Sillimaniarneq uagutsinnut pingaaruteqarluartuummat sapinngisatsinnik iliuuseqartarpugut, ullullu tamaasa taamaaliortarluta.

Niaqumut illersuut sillimaniarnermilu kamiit

Pisortap oqarnera naapertorlugu immikkoortumi tassani sillimaniarnermut ersarissunik malittarisassaqarpoq. Malittarisassallu sulisut malittussaavaat – tamanna aamma nammineq akisussaaffigineqarpoq, taanna oqarpoq.

- Suliassat akisussaassuseqartumik akuersaarneqarsinnaasumillu naammassineqarnissaannut qulakkeerinissamut sulisut nammineq ulluinnarni aamma akisussaassuseqartut sulisutsinnut ullut tamaasa erseqqissartarparput.

- Atorneqarsinnaasunik niaqumut illersuutaateqarpugut, aamma niaqumut illersuutit, aaqanngitsut, sillimaniarnermilu kamiit atorneqartussaapput. Ingiaqateqarnanilu immikkoortortami ingerlasoqaqqusaanngilaq, taanna oqarpoq.

- Kisianni alianartumik ajutoortoqarnerata kingornatigut taama pisoqaqqinnginnissaanik qulakkeeriniarluta soorunami iliuuseqarnerunikuuvugut, taanna oqarpoq.

Ajortuliortutut saqqummiunneqartutut misigisimasoq

Eqqartuussinerup kingorna Kalaallit Nunaanni Politiit tusagassiuutinut nalunaaruteqarput. Tassani Sulinermik Nakkutilliisut suliffeqarfiup 40.000 koruuninik akiligassissimagaa – Usisaalli akiliiumasimanngitsoq allassimavoq. Tassa politiit oqarnerat naapertorlugu suliffeqarfiup akiligassaq akilerumasimanngilaa.

Nalunaarulli taanna pisortap aliasuutigaa. Taassumami suliffeqarfik akiliiumanngitsutut ajortutut saqqummiunneqarsoraa.

- Akiligassamik akuersiumannginnikuunngilagut, Kenneth Jahn Andersen KNR-imut oqarpoq.

- Taamaallaat suliamut atatillugu iliuuseqarsinnaaniassagatta suliaq pillugu allagaatinik politiinit kissaateqarnikuuvugut, Kenneth Jahn Andersen oqarpoq.

Kenneth Andersenip oqarnera naapertorlugu suliffeqarfiup allagaatit taakku aatsaat 2023-mi juulimi pissarsiarai.

Taakku politiit unnerluussutaanni februaarimi saqqummiunneqarput. Suliffeqarfillu ullut 14-it qaangiutsinnagit qisuariaateqaqquneqarpoq – taassumali allagaatit takoqqaarusussimavai.

- Politiinit akiligassiissut pissarsiarisarput qiviaraanni taanna januaarimi anillatsinneqarsimavoq, februaarillu 22-ani nalunaarutigineqarluni, suliamilu allagaatit aatsaat 2023-mi juulimi pissarsiaraagut. Tassa imaappoq allagaatit piumasagut eqqartuussissuserisutsinnut nassiunneqarnissaannut politiit qaammatit arfineq-marluk atorpaat, taanna oqarpoq.

- Akiligassat akilerniarlugu aalajangerpugut, aamma akiligassaq akiligassalluunniit annertussusaa akerlilinngisaannarparput.