Sulisitsisoq ajunaartoqarnerata kingunerisaanik akiliisussanngortoq
Angut 64-inik ukiulik Nuummi suliffigisamini 8 meterimik portussuseqartumit 2022-mi septembarip arfineq-aappaani nakkarnermini ajunaarpoq.
Angutip ajoqusernini toqqutigai.
Tamanna pillugu suliaq eqqartuussivimmi ullumi suliarineqarpoq, sulisitsisorlu 40.000 koruuninik akiligassinneqassasoq eqqartuussiviup aalajangerpaa.
Ajutoorneq Usisaatip Nuummi quersuani pivoq.
Karsi nammineq sanaaq atorlugu kivinneqartoq
Politiit oqarnerat naapertorlugu pisoq sulinermi avatangiisit pillugit inatsisinik unioqqutitsisoqarsinnaasoq, Sulinermi Nakkutilliisut suleqatigigalugit misissorneqarpoq.
Misissueqqissaarnermi sulisoq ajunaartoq quersuarmi ilioraavimmit karsimik tigusiniarluni karsimi nammineq sanaamiittoq gaffeltruckinik kivinneqarsimasoq paasineqartoq, tusagassiuutinut nalunaarummi allassimavoq.
Kalaallit Nunaanni Politiivisa unnerluussisussaatitaasuinit unnerluussisoq, Cecilie Stürup Sørensen suliami unnerluutiginnittuusoq ima oqarpoq:
- Sulisitsisoq suliffimmi avatangiisit pitsaasuullutillu toqqisisimanarnissaannik qulakkeerinissamut pisussaaffimminik naammassinnissimanngitsoq uagut Sulinermi Nakkutilliisullu nalilerparput. Sulisup karsimik nammineq sanaamik atuinerata saniatigut sulisoq ujatsiutaasaqarsimanngilaq, niaqumut illersuuteqarsimanngilaq allanillu isumannaallisaanermi atortoqarsimanani. Suliffeqarfimmi isumannaatsoqarnissaata qulakkeernissaa sulisitsisup akisussaaffigiuaannarpaa.
Suliassanngorteqqinneqassanersoq suli aalajangiiffiginngikkaa
Sulinermi nakkutilliisut suliffeqarfik 40.000 koruuninik akiligassissimagaluarpaa. Suliffeqarfiulli tamanna akueriumasimanngikkaa politiit oqaatigaat.
- Suliaq taamaammat eqqartuussivitsigut suliarineqarpoq. Eqqartuussiviullu Sulinermi Nakkutilliisut Kalaallit Nunaanni Politiillu isumaqatigai, tassa sulisitsisoq suliffimmi avatangiisinut pisussaaffinnut tunngatillugu naammassinnissimanngitsoq, taamaammallu suliffeqarfik 40.000 koruuninik akiligassippaa, tusagassiuutinut nalunaarummi allassimavoq.
Usisaat imaluunniit unnerluussisussaatitaasut suliaq Nunatta Eqqartuussisuuneqarfianut ingerlateqqinniarnerlugu suli aalajanginngilaat.
