USA-p umiarsuaq uuliamik assartuut mattussinermik unioqqutitsinerarlugu saassukkaa

Amerikamiut sakkutuui uuliamik assartuummik Iranip umiarsualiviata tungaanut Persiap Kangerliumanersuani angalasumik saassussillutillu unitsitsipput.

USA-p sakkutuuisa qullersaqarfiat, Centcom, inoqatinut attaveqaatikkut X-ikkut taama allappoq.

Umiarsuup „MT Belma“-p, Curaçaomi nalunaarsorneqqasup Centcom-ip nutaarsiassiinera naapertorlugu, Amerikamiut umiarsuarnik Iranimut Iranimiillu angalasunik mattussinera unioqqutippaa.

- Umiarsuup inuussutissarsiutaasup USA-p umiarsuarnik mattussineranik unioqqutitsiniarnermini mianersoqqussutit arlallit qisuariarfiginngilai.

- Amerikamiut sakkutuui timmisartortartut igeriuttakkanik Hellfirenik taagorneqartunik umiarsuup pujoorfiata tungaanut igeriussimmata, umiarsuaq ingerlasinnaajunnaarsippaat. Umiarsuaq Iranip tungaanukarunnaartoq, Centcom X-imi allappoq.

USA-p sakkutuui Iranip umiarsualiviinik umiarsuarnut marlunngornermi unnukkut nalunaaqutaq 22.00 mattusseqqipput.

Umiarsuaq MT Belma, Centcom-ip nutaarsiassiinera naapertorlugu, Iranimi qeqertamut uuliasiorfiusumut Khargip tungaanut angalagaluarpoq. Umiarsuup useqarsimannginnera aamma oqaatigineqarpoq.

Umiarsuit marluk Amerikamiut peqqussutaat naapertorlugit allamut ingerlaartussanngortinneqarsimasut, Centcom allappoq.

Saassussinerit arlallit

USA-p sakkutuui Iranimi sisamanngornerup unnuaani saassusseqattaareersullu taama nalunaaruteqartoqarpoq.

Iranimiut sakkutooqarfiinut, igeriuttakkanik dronenillu atortuusivinnut, silaannakkut illersornissaqarfinnut sinerissamilu nakkutilliisoqarfiit saassunneqarput. Iranip inuinnaat umiarsuarmik angallanneranik siooranartorsiortitsinnginnissaa siunertarineqartoq, nalunaarutigineqarpoq.

Illoqarfinnut arlalinnut, Bandar Abbasimut ilaatigut saassussinerit unitsinneqartut, Centcom danskit nalunaaqutaat malillugu 03.20 allappoq.

Iranip nutaarsiassaqartitsivia Mehr sisamanngornerup unnuaani siusinnerusukkut nalunaarpoq, Iranip silaannakkut illersornissaqarfia Iranip illoqarfiisa pingaarnersaanni Teheranimi piareersimatinneqartoq. Nutaarsiassaqartitsiviit Reuters aamma AFP taama allaaserinnipput.

Centcom Teheranimut saassussineq pillugu eqqaasaqanngilaq.

Iranip kitaatungaani nunap immikkoortuani Lorestanimi Iranillu avannaata tungaani nunap immikkoortuani Semnanimi qaartitsisoqarsimanera  sisamanngornermi ullaakkut aamma nalunaarutigineqarpoq. Mehr AFP-ip nutaarsiassiinera naapertorlugu taama allaaserinnippoq.

Iranip Jordanimi Amerikamiut sakkutooqarfiinut saassussisimanera sisamanngornerup ullaavani aamma nalunaarutigineqarpoq.

Iranip sakkutuuisa, Amerikamiut orsussaasivii attaveqaqatigiinnermullu atortui, Amerikamiut saassussinerannut akiniutitut, dronet atorlugit saassuppaat. Iranip sakkutuui taama nalunaarsimanerat Iranimi tv-kkut aallakaatitsiveqarfik Irib, AFP-ip nutaarsiassiinera naapertorlugu nalunaaruteqarpoq.

/Ritzau