USA-p Danmarkimi aallartitaqarfimmini sulisut Trump nunarpullu pillugit allagaatinik piumasaqarfigai
USA-p Københavnimi aallartitaqarfiani Nuummilu konsuuleqarfiani sulisut USA-p præsidentia Donald Trump pillugu taassumalu nunatsinnik pisiaqarnissamik kissaateqarneranut tunngasunik tamanik tunniussaqarnissamik piumaffigineqarput.
USA-p nunanut allanut ministereqarfia taama peqqusisuuvoq. Suliffeqarfiup iluani e-mailit arlallit aviisip pigisai tunngavigalugit Politiken taama allappoq.
Allagaatit taakku allagaatinik takunnikkumanermut akissutitut atorneqarumaartut, USA-mi nunanut allanut tunngasunut ministereqarfik allappoq.
Allagaatinik takunnikkumasut kikkuunersut allassimasoqanngilaq, Politiken allappoq.
Aallartitaqarfimmi konsuuleqarfimmilu sulisut 30-t missaanniittut allagaatinik isertuussanik isertuussaanngitsunillu tunniussissapput. Ilaatigut allagaatit allakkatigullu attaveqatigiinnerit Trumpimut nunatsinnullu tunngasut pineqarput.
Allagaatittaaq præsidentip ernerata Donald Trump juniorip 2025-mi januaarip arfineq-aappaanni nunatsinnut tikeraarneranut tunngasut USA-p nunanut allanut ministereqarfianut tunniunneqassapput.
E-mailinittaaq nammineq pigisanit, sms-init inoqatinullu attaveqaqatigiittarfinni allassimasunit paasissutissanik sulisut tunniussissapput.
Aallartitaqarfimmi pisortaaneq peqqusisoq
Noqqaassut qaammatini pingasuni 2024 oktobarip aallaqqaataanit 2025-mi januarip arfineq-aappaannut – ulloq Donald Trump juniorip nunatsinnut tikeraarneranut – atuuttussaatinneqarpoq.
Sulisut juunip 13-ianni peqquneqarput, sapaatip-akunneralu ataaseq allagaatinik tunniussinissamut piffissalerneqarlutik.
Aallartitaqarfimmi pisortaaneq, USA-p nunanut allanut tunngasunut ministereqarfianit peqquneqarnermik malinnittoq, taama peqqusivoq. Allagaatinik takunnikkumanermut akissuteqarnissamut allagaatit ministereqarfiup atortussaavai.
Immikkut ilisimasallit Politikenimit oqaloqatigineqarsimasut arlallit allagaatinik takunnissinnaanissamik qinnuteqaat tupigusuutigaat.
Niels Bjerre-Poulsen, Syddansk Universitetimi Amerikamik Ilisimatusarnermi lektoriusoq, taakkua ilagaat.
Ilaatigut allagaatinik takunnissinnaaneq pillugu qinnuteqaatip qanoq piaartigisumik suliarineqarnera tupigusuutigaa.
- Uanga nammineq allagaatinik takunnissinnaajumallunga USA-mi oqartussaasunut qinnuteqarnikuuvunga, qinnutigalu ukiuni arfineq-pingasuni suliarineqarpoq, Politikenimut oqarpoq.
