Politiit ullormut nalunaarutaat: Inuup saarnganik nassaarneq politiinut nalunaarutigineqartoq
Kalaallit Nunaanni Politiit allaanerulaamik ippassaq ualikkut nalunaarutisipput. Tassa inuup saarnganik Noorlerni nassaarisimasaminnik politeeqarfimmut tunniussiartortoqarmat.
- Ilerrit iliveqarfitoqarlu eqqissisimatitaapput, taamaattumik taakkunani nassaarsimagaanni nassarneqartassanngillat, sillimasut pisortaat Poul Kreutzmann erseqqissaavoq.
Saaneq kingorna politiinit katersugaasiviliaanneqarpoq.
Inuit marluk mittarfimmi tigusarineqartut
Angut 39-nik ukiulik Danmarkimiit tikittoq hashimik 700 gramminik nunatsinnut eqqusseriarsimasutut Nuummi mittarfimmi tigusarineqarpoq.
Angut siornatigut assigusumik iliorsimavoq taamaammat tigusarineqarpoq ullumi kingusinnerusukkut ingerlaannartumik unnerluunneqarnissaa siunertaralugu sassartinneqassalluni.
angut 21-nik ukiulik aningaasarpassuit nassarlugit nunatsinniit aallariartortoq tigusarineqarpoq. Aningaasanik peqquserlussimasutut pasineqarluni tigusarineqarpoq kingornali iperagaalluni.
Angut imigassartorsimatilluni biilersimasutut Sisimiuni pasineqarpoq. Sillimasullu pisortaata imigassamik aalakoornartortalimmik atuinermut tunngassuteqartunik sineriak tamakkerlugu pisoqaqattaarnera pissutigalugu ulloq ulapaarfiunerarpaa.
