Qullissat eqqaanni misissuilluni qillerisoqalersoq
Tuluit ingerlatseqatigiiffiutaat 80 Mile Plc Qeqertarsuarmi Qullissat eqqaanni misissuillutik qillerilertoq, ingerlatseqatigiiffik piginneqataassutinik niuffaffinnut nalunaarpoq.
Nikkilimik, kanngussammik, koboltimik saffiugassanillu platininik assigiinngitsunik misissuinissamut sumiiffinni marlunni qillerisoqartoq, nalunaarummi allaqqavoq.
Qullissat eqqaanni qillereqqaariarlutik Qeqertarsuup avannaata kangiani sumiiffinni allani Nuussuullu avannarpasissortaani misissuilluni qillerinissaq pilersaarutaasoq, ingerlatseqatigiiffik allappoq.
Amerikamiut ingerlatseqatigiiffiat USFM Corporation suleqatigalugu qillerisoqassasoq, nalunaarummi allaqqavoq.
Robert Price USFM Corporationimi pisortaasoq, ingerlatseqatigiiffiup taassuma nittartagaani allaqqavoq.
Robert Price aamma Nunap Qeqqani Jameson Landimik siornatigut taaneqartartumi uuliasiornissamut misissuinermut atatillugu qilleriniartumi Greenland Energy Companymi siuttuuvoq.
Ingerlatseqatigiiffiit isumaqatigiissutaanni USFM Corporation kitaani qillerinermut katillugit 30 millionit dollarinik aningaasaliissaaq, 80 Mileli suliniutip misissuinermiinnerani ingerlatsinermut siuttuussalluni.
USFM Corporationip isumaqatigiissummi piumasaqaatit naammassigunigit suliniummi piginneqataassutai 51 procentinngorsinnaapput.
"Alloriarneq pingaarutilik"
Sivisuumik pilersaarusioreerlutik, akuersissutisiniartareerlutik taavalu sulisoqarnikkut atortoqarnikkullu piareersareerlutik misissuillutik qillerisinnaanngorlutik, 80 Milep pisortaa, Roderick McIllree nalunaarummi oqarpoq.
- Qillerinerit aallartinnerat Qeqertarsuarmi suliniummut pingaarutilimmik alloriarneruvoq, taanna oqarpoq.
Sumiiffinni arlalinni katillugit 9.000 miiterinik 2026-imi qillerinerup nalaani qillerinissaq pilersaarutaasoq, nalunaarummi allaqqavoq.
- Misissuinermi pingaaruteqarluinnartuusorisatsinnut maanna iserpugut, Roderick McIllree oqarpoq.
Misissuilluni qillerisoqarpoq. Tassalu suli piiaasoqanngilaq. Piiaanissamut suli arlalinnik alloriaqqaartussaassapput.
80 Mile Bluejay Miningimik siornatigut taaguuteqarpoq, nunatsinnilu aatsitassarsiornissamut allanik suliniuteqarluni.
Qaanaap eqqaani ilminittisiornissamut misissuinissamik akuersissuteqartumik Dundas Titaniumimik piginnittuuvoq, taavalu Nunap Qeqqani Jameson Landimik siornatigut taaneqartartumi uuliasiornissamut misissuinissamik akuersissuteqartumik White Flamemik piginnittuulluni.
Tuluit ingerlatseqatigiiffiat White Flame Amerikamiut ingerlatseqatigiiffiannik Greenland Energy Companymik suleqateqarluni Nunap Qeqqani uuliasiorniarnermik suliniuteqarpoq.
