Bluejay Amerikamiut pisoorsuit aningaasaliisoralugit Qeqertarsuarmi saffiugassarnialersoq

Bluejay Mining Qeqertarsuarmi kanngussamik, nikkelimik, kobolt platinimillu aatsitassarsiorniarpoq.

Saffiugassat taakku biilit innaallagiatortut batteriissaanut atorneqassapput.

Saffiugassanik misissuinissamik ineriartortitsinissamillu piginneqatigiiffik, Amerikamiut piginneqatigiiffianut KoBold Metalsimik taaguuteqartumik, suleqatiginninnissamik isumaqatigiissuteqarpoq. Suleqatigiinissamut isumaqatigiissut Londonimi niueqatigiiffimmi ippassaq saqqummiunneqarpoq.

Tamanna Bluejay Miningip tusagassiuutinut nalunaarutigaat. 

95 millionit koruunit tikillugit aningaasaleerusuttut

KoBold Metals ilisarnartunik aningaasaliiffigineqarpoq: aningaasaatilissuit tassaasut Bill Gates, Michael Bloomberg Jeff Bezosilu.

Norskit naalagaaffiata uuliamik nukissiorfimmillu piginneqatigiiffiat, Equinor, Amerikamiut piginneqatigiiffianut aningaasaleeqqataavortaaq. 

Aatsitassanik piiaanermut atatillugu avatangisiinik inuiaqatigiinnullu akisussaassuseqarneq KoBold Metalsip siunertaraa. 2024-p naanissaata tungaanut aatsitassarsiornissamut, KoBold Metals Bluejay Miningilu suleqatigiinissamut isumaqatigiissuteqarnerminni, 95 millionit koruunit tikillugit aningaasaliissuteqassapput.

AAMMA ATUARUK Bluejay Mining Qaanaap kujasissortaani ilmenitimik piaanissaaminut qanilleriaqqittoq

Aatsitassarsiornissamut suleqatigiinnissamut isumaqatigiissuteqarnermi KoBold Metals 51 procent tikillugu Bluejayilu 49 procent tikillugu piginneqatigiittoqassaaq.

- Una isumaqatigiissut Bluejayimut allannguissaaq, piginneqatigiiffimmi pisortaaneq Bo Steensgaard tusagassiuutinut nalunaarummi oqarpoq.

- Teknikkikkut misissueriaatsinut nutaanut ineriartortitsisunik, nunarsuarmi ingerlalluarnerpaanik aningaasaliiffigineqartumik suleqateqarsinnaagatta nuannaarutigaarput. 

Dundas atuisinnaanermut akuersissuteqalersoq

Diskomi suli aatsitassarsiulersaartoqanngikkallarmat Bluejay Mining Dundas Titaniumimi ukiuni tallimani aatsitassarsiortuuvoq – ukioq kingulleq decembarimi aatsitassarsiornissamik Naalakkersuisunit akuerineqarpoq.

Aatsitassarsiorfimmi sanaartorfissamut saffiugassanullu suliaqarfissanut aningaasaliisussanik Bluejay Mining ujartuileruttorpoq. Dundasimi aatsitassarsiorneq Qaanaap kujasissuani 80 kilometerinik, Thule Air Basemiillu 40 kilometerinik kangisissulimmi isorartutigisulimmiippoq.

Qeqertarsuarmili metallinik ujarlerluni assaanissaq piviusunngussappat, piffissaq sivisooq ingerlaqqaassaaq.

Suliap inuiaqatigiinnut avatangiisinullu kingunerisinnaasai pillugit nalunaarusiortoqaqqaassaaq, suliniut aallartissappat Naalakkersuisunit akuerineqaqqaartussamik

Suliniut aamma tamanut tusarniutigineqaqqaassaaq, tusarniaanermilu oqaaseqaatit Naalakkersuisunit suliarineqaqqaassallutik. Tamanna akuerineqassappat Bluejay piiaanissamut akuersissummik Naalakkersuisut aamma qinnuteqaqqaassaaq, Naalakkersuisut akuereqqaagassaannik.