Tyskit illersornissamut ministeriata nunarput tikeraarnialikkersaaraa

Tyskit illersornissamut ministeriata, Boris Pistoriusip danskeq suleqatini, Troels Lund Poulsen (V) peqatigalugu nunarput septembarimi tikeraarnialikkersaarpaa.

Tyskit nutaarsiassaqartitsiviat, dpa tyskillu tusagassiorfii allat arlallit taama allaaserisaqarput.

- Kalaallit Nunaat takorusukkakku tapersersuinerpullu takutillugu, Pistorius oqartoq Tagesspiel allappoq.

Dpa-p allaaserisaa naapertorlugu taassuma Atlantikup avannaata imartaani Issittumilu ersarissuunissaq pingaaruteqarsoraa.

Tysklandip illersornissamut ministeriata Troels Lund Poulsenimik ataatsimeeqatiginnikkiartorluni ataasinngornermi Københavnimiilluni tikeraarsinnaaneq oqaatigaa.

Illersornissamut ministereqarfimmit tusagassiuutinut nalunaarut naapertorlugu nunamit silaannakkut illersornissaq, imaatigut sillimaniarneq illersornissamilu suleqatigiinneq pitsaanerusoq oqaluuserineqarput.

Atlantikup avannaa pillugu suleqatigiinneq

Danmarkip Tyskland, Canada Norgelu Atlantikup avannaata imartaani sillimaniarnermut suleqatigiinnissaq sapaatip akunnerata siuliani isumaqatigiissutigaat.

Nunat taakku sungiusarnerni kiisalu illersornissamut atortunik pisinerni ilaatigut suleqatigiissasut, siusinnerusukkut paasissutissiissutigineqarpoq.

Pistorius danskit illersornissamut ministeriat peqatigalugu nunatsinnut tikeraassaguni nunarput Europami politikerinit ukioq manna aatsaat siullermeertumik tikeraarneqassanngilaq.

Franskit præsidentiata, Emmanuel Macronip nunarput sapaatit akunnerisa marluk matuma siorna tikeraarpaa.

Macronip tikeraarnerminut atatillugu tusagassiortunik katersortitsinermi Danmarkimut kalaallinullu tapersersuinini aamma nalunaarutigaa.

Amerikamiut præsidentiata, Donald Trumpip nunatsinnik aqutsilernissamik soqutiginninni arlaleriarluni oqaatigereeraalu nunat tamalaat nunatsinnik soqutiginnilerput.

USA-p præsidentiata tullersortaa, J.D. Vance amerikamiut sakkutooqarfianut Pituffimmut ukioq manna siusinnerusukkut sivikitsumik tikeraarpoq.

Nunatta Danmarkillu USA-p nunatsinnik aqutsilerniarnera itigartitsissutigisarpaat.