Tusagassiuut: Arfernik ilisimatusartoq politikkikkut avissaartuutsitsinissamik ernumassuteqarluni USA-mik suleqateqarnissani itigartitsissutigigaa

Danmarkimiit arfernik ilisimatusartoq Peter Teglberg Madsen Amerikamiut oqartussaqarfiannit National Oceanic and Atmospheric Administrationimit ukiup aallartinnerani suleqatiserineqaraluarpoq. 

Nunatsinni aarrit misissornissaannut aningaasaliiffiginiarneqaraluarpoq. 

Suleqatigiinnerulli naalagaaffeqatigiinnermik avissaartuutsitsinissamut atorneqarsinnaanissaa ernumassutigalugu suleqatiserinnittunut itigartitsivoq. 

Tusagassiorfik Politiken taama allappoq.

Ilisimatusarneq marloqiusamik atorneqarsinnaasoq

Naak arferit attaveqariaasaanni ilisimatusarneq ajortuunngikkaluartoq, ilisimatusarnerup iluani marloqiusamik atorneqarsinnaasutut assersuutissaalluarpoq. 

Oqaaseq ’marloqiusamik atorneqarsinnaasoq’ paasissutissat katersorneqartut sakkutooqarnermut isumannaallisaarnermulluunniit atorneqarsinnaaneratut isumaqarpoq. 

Ilisimatusartup arferit attaveqariaasaannik hydrofonimik taaneqartartoq atorlugu misissuiguni nipinik allanik tigooqqaasinnaavoq soorlu aqqartartunit atomimik ingerlatilinnit. 

Politikenimi Peter Teglberg Madsenip oqarnera naapertorlugu suleqatigiinnerup naalagaaffimmik avissaartuutsitsinissamut atorneqarsinnaanera ernumagalugu itigartitsisimavoq. 

- Qilalukkanik qernertanik soqutiginnileriataarnerat upperissagaanni sianiilliornerujussuussaaq, Peter Teglberg Madsen taama oqarpoq.

Ilisimatusartup USA-mit aningaasaliiffigineqarnermigut ilisimatusaatimi politikkikkut atorneqarsinnaanera ernumagalugu oqaatigaa. Assersuutigalugu Danmarkimiunngitsoq nunatsinnili ilisimatusarnermut aningaasaliisimanertik oqaluttualiarisinnaammassuk.