USA-mi ullup ataatsip ingerlanerani 29-t toqutaasut
Texasip illoqarfiisa ilaanni El Pasomi pisiniarfissuarmi ippassaq aallaasersortoqarmat inuit 20-t toqutaapput, 26-llu ikilerneqarlutik. Angut 21-nik ukiulik Dallasimeersoq saassussisutut pasineqartoq politiinit tigusarineqarpoq.
Ammilli qalipaataanik immikkoortitsinerit aallaavigalugu saassusisoqarsimasinnaanera politiinit maanna misissorneqaleruttorpoq. Latinamerikanerit Amerikamut nuuttut amerikamiut suliffissaraluannik arsaartaraat 21-nik ukiullip saassussinerminut tunngavilersuutigigaa nutaarsiassaqartitsivik CNN allappoq.
Hunnorujulikkaat toqutaasimasinnaasut
Ohiomi imerniartarfiup ungasinngisaani sapaatip ullaassaani aamma aallaasersortoqarpoq. Saassussisup minutsip ataatsip ingerlanerani inuit qulingiluat inuartarai, 16-illu ikilerlugit. Taanna saassussineranit minutsit ingerlanerani politiinit aallaaneqarluni toquvoq.
AAMMA ATUARUK Texasimi aallaasersortoqarmat ikinnerpaarmik qulit toqutaasut
- Daytinip politiivi kingusinnerusukkut takkussimasuuppata inuit hunnorujulikkaat toqutaasimassagaluarput, Daytonip borgmesteria Nan Whaley oqarpoq.
USA-mi sakkut pillugit inatsit National Rifle Associationimit republikanerinillu tapersersorneqartoq præsidentimut qineqqusaartut demokraatineersut arlallit sukatertariaqarnerarpaat, nutaarsiassaqartitsivik Ritzau allappoq.
Amerikami aallaasersornerit marluk sakkut pillugit inatsisiseqarnerup aaqqissuussaanera oqallisigineqaqqilersippaa. Ukioq mannami aallaasersornerit maanna 251-issarilerpaat.
Siorna aallaasersornerit 340-sut The Gun Violence Archivemit nalunaarsorneqarput.