USA-mi naalagaaffiup unnerluussisuata Trump pinerluuteqarsimanersoq misissoraa
Amerikamiut præsidenterisimasaata Donald Trumpip niuertarfiutaani aningaasaqarneranilu pinerluttuliortoqarsimasinnaaneranik misissuisoqalersoq, New Yorkimi naalagaaffiup unnerluussisua nalunaaruteqarpoq.
- Trumipip suliffeqaarfiutaa, Trump Organization, pinerluttoqarsimaneranik paasiniaasoqarnera pillugu ilisimatipparput, Fabien Levy New Yorkimi naalagaaffiup unnerluussisuata oqaaseqartittagaa oqarpoq.
Trumpip aningaasarsiornikkut suliaani pinerluttoqarsimaneranik paasiaanerit New Yorkimi ukiuni arlalinni præsidentinngornissaa sioqqulluguli aallartipput.
Trump taarsigassarsiniaraangami pigisami nalinginik annertunaarisarsimanerarlugu akileraartussaagaangamilu pigisaminik nalikilliisarnerarlugu pasilliuteqartoqarnerata kingunerisaanik tassa 2019-imi maajimi New Yorkimi naalagaaffiup unnerluussisuata misissuinini aallartippaa.
Inatsisinik unioqqutsisimanerarlugu pisuutinneqarnini ilumuunngitsut Trump oqarpoq, ilanngullugulu oqaatigaa tamat oqartussaanerat naapertorlugu naalagaaffiup unnerluussisua ”politikkikkut akiniaanermik” suliaqartuusoq.
- Manhattanimi unnerluussisussaatitaasut peqatigalugit Trump Organization pinerluuteqartoqarsimasinnaanera pillugu misissuiffigaarput, Fabian Levy oqarpoq, nangillunilu naalagaaffiup unnerluussisua suliamut atatillugu annertusumik piffisami matumani oqaasissaqannginnerarlugu.
Akileraartarnermut tunngasunik paasissutissiiumanngitsoq
Præsidentiusimasoq pasilliutigineqartuni qanoq ilaatiginersoq erseqqissumik oqaatigineqanngilaq.
Naalagaaffiup unnerluussisuata, Letitia Jamesip inuinnaat akornanni saqitsaassutik misissuineq, Trumpip pigisami nalinginik annertunaarisarsimanerarlugu akileraartussaagaangamilu pigisaminik nalikilliisarnerarlugu pasilliuteqartoqareernerani, 2019-imi maajimi aallarnerpaa.
Taassuma allaffeqarfiata Trump Organizationip Manhattanimi, New Yorkimi, Chicagomi Los Angelesimilu illuutinik niuernermut suliaanut takunnissinnaalernissaq aamma noqqaassutigaa.
Trumpip præsidentip illorsuaniinnermini akileraartarnerminut tunngatillugu paasissutissat naak politikikkut kimigiisertoqangaatsiaraluartoq tunniukkusunngivissimavai.
Misissuinermi qanoq allanngortoqarsimanera pillugu imaluunniit sooq tamanut saqqummiunneqarnersoq itinerusumik paasissutissaqanngilaq.
