URANI Uranimut akerliussutsimik sumiiffinni arlalinni takutitsisoqassaaq
Uranimik atuinissamik akerliusut peqatigiiffii, Uran Naamik illoqarfinni assigiinngitsuni ullumi nalunaaqutaq sisamaniit akerliussutsimik takutitsissapput. Aasianni, Narsami, Qaqortumi, Nuummi, Tasiilami, Ilulissani, Qeqertarsuarmi, Narsarsuarmi Qassiarsummilu. Taasatsinni kingullermi akerliussutsimik takutitsineq nalunaaqutaq ullup qeqqanut aallartissaaq. Nanortalimmi akerliussutsimik takutitsinissaq silarlunnera pissutigalugu taamaatiinnarneqarpoq.
Uranimut apeqqut pillugu innuttaasut aperineqartariaqartut, taasitinneqannginnermilu kalaallisut paasititsiniaasoqarnissaa pisariaqartoq, peqatigiiffik isumaqarpoq.
- Politikkikkut ingerlatseriaaseq tamat oqartussaanerannik, inuillu piginnaatitaaffiinik aallaavilik ujartoritsik, Uran naami-meersoq Erik Jensen oqarpoq.
Aamma atuaruk Uranisiornermut akerliusut akerliussutsimik takutitsilersut
Qaqortumi Siumup immikkoortortaqarfia qulequtserlugu "aatsitassat qaqutigoortut 0,03 procentimik uranitallit piiarneqarnissaat" illersorlugu nalunaaqutaq ullup qeqqanut aallartittumik ingerlaaqatigiissapput.
Suliffissat inuussutissarsiutillu ineriartortinnissaat, aammalu peqqinnerup, pinngortap, avatanngiisillu qajassuunneratigut aatsitassanik 0,03 procentimik uranitaqartut piiasoqarnissaa tapersersorlugu ingerlaaqatigiinniarlutik, Marie Lyberth Qaqortumi Siumumeersoq allappoq.
Inuit Ataqatigiit, Partii Naleraq, Atassullu uranimut apeqqummut innuttaasut taasitinneqarnissaanniik tamarmik immikkut siunnersuuteqarput, siunnersuutillu arlaat partiinit taakkunannga pingasunit tamanit taperserneqarpat, uranimut tunngatillugu innuttaasut taasitinneqarnissaat Inatsisartuni amerlanerussuteqarfigineqalissaaq.