Uranisiornermut akerliusut akerliussutsimik takutitsilersut

Kuannersuarni Narsap eqqaaniittumi aatsitassanik uranitalinnik piaanissamut pilersaarummut akerliusut, akerliussutsiminik takutitsinissamik pilersaaruteqarput.
marsip 10-at 2016 06:24

Akerliussutsimik takutitsinissamik aaqqissuussisut taaguuteqarput " Kuannersuarni uranitalinnik aatsitassarsiorniarnermut uranisiorniarnermullu akerliullutik suliniaqatigiit".

Suliniaqatigiiit isumaqarput innuttaasunik paasititsiniaaneq naammanngitsoq, aamma innuttaasut uranitalinnik aatsitassarsiorniarneq uranisiorniarnerlu pillugu taasitinneqartariaqartut.

Akerliussutsimik takutitsineq pissaaq aprilip arfineq-pingajuani nalunaaqutaq 12.00, illoqarfinni Narsami, Qaqortumi, Nuummi, Tasiilami, Ilulissani Qeqertarsuarmi, Qassiarsummi, Narsarsuarmi sumiiffinnilu allani akerliussutsimik takutitsinissami innuttaasut peqataarusuttut tamarmik tikilluaqquneqartut, suliniaqatigiiffik tusagassiuutinut nalunaaruteqarluni taama allappoq.