ASSIT Urani pillugu qalipakkat Narsami saqqummersinneqassapput
Saqqummersitsineq Nuuk Kunstmuseumimut aggustip 17-iata tungaanut alakkarneqarsinnaasoq, Narsamut ingerlaqqikkumaarpoq.
- Aap, saqqummersitsineq Narsamut ingerlaqqissaaq, Narsamilu katersugaasivimmi A21-imi septembarip qeqqaniit saqqummersinneqassallutik, Bolatta Silis-Høegh oqarpoq, nangillunilu:
- Uranimut naaggaarluinnarnerup atorunnaarsinneqarfiani, uranisiorfissatullu pilersaarutigineqartumi suliakka saqqummersikkusussimavakka.
Aamma atuaruk Nuuk Kunstmuseumimi sapiitsuliornermik isornartorsiuinermillu takutitsineq
Saqqummersitsinermi qalipakkat pissanganartuliat, uranimut naaggaarluinnarnerup atorunnaarsinneqarneranik isornartorsiuisut takuneqarsinnaapput.
Eqqumiitsuliortoq Bolatta Silis-Høesh oqaluttuarpoq uranimut naaggaarluinnarneq atorunnaarsinneqarmat qanoq timimigut napparsimasutut misigilersimanerluni. Kujataani meeraanerminit eqqaamasani ingasaassisutut pilluni qalipalersimavai, ersinini unitsikkusullugu. Napparsimasutut misigisimalerpoq niaqorlullunilu. Arnanut persuttaasoqarpallaartoq misigisimareerluni maanna aamma pinngortitamut persuttaasoqarnialerpoq.
- Alliartorpunga "Urani? Naamik" isigalugu eqqaamavaralu meeraallunga Danmarkimi ataatagalu sissamiilluta atomip nukinganik nukissiorfissuaq Barsebäck tikkuaraa oqaluttuartorlu tassani ajutoortoqassagaluarpat Københavni piuneerutissasoq, Bolatta Silis-Høegh oqarpoq.
Aamma atuaruk Katuami oqallitsitsineq: Eqqumiitsuliorneq aatsitassarsiornerlu
Saqqummersitami assilialiat angisoorujussuit aqqaneq marluk takuneqarsinnaapput tassaallutik pinngortitaq taartunik qalipaasersugaq, qilak nuiapiluttoq aamma arnaq atisaqarani aanaartoq. Saqqummersinneqartuni assilialiat tallimat Københavnimi saqqummersinneqarneranni Nunatta Katersugaasivianit Allagaateqarfianillu pisiarineqarput.