Upalungaarsimaniarneq pillugu isumaqatigiissut toqqissisimanerulersitsissaaq
Pinngortitamut, Avatangiisinut Nukissiuuteqarnermullu Naalakkersuisup, Mala Høy Kúkop aamma danskit Illersornissamut ministeriata Peter Christensenip upalungaarsimaniarneq pillugu suleqatigiinnissamik isumaqatigiissut marlunngormat atsioqatigiissutigaat.
Nunatta Danmarkillu akornanni upalungaarsimaniarneq pillugu isumaqatigiissutaavoq nutaaq. Taannalu toqqissisimanerulersitsissaaq, Mala Høy Kúko taama oqarpoq.
- Innuttaasunut toqqissisimanerulersitsissaq. Qatserisartortatta pitsaanerusumik pikkorissarsinnaalernerat ilinniagaqarsinnaalernerallu iluaqutigissavarput, naalakkersuisoq oqarpoq.
Qatserisartut nalinginnaasumik kajumissutsiminnik sulisuusut pikkorissarnissaminnut amerlanerusunik periarfissaqartinnissaat isumaqatigiissummi anguniarneqarpoq.
- Illoqarfinni nunaqarfinnilu qatserisartut 900-sut pikkorissarnissaminnut qaffasinnerusumillu ilinniagaqarnissaminnut periarfissagissaanerulissapput, Mala Høy Kúko taama oqarpoq.
Pikkorissartitsinerit Danmarkimiunerusoq ingerlanneqartassapput, nunatsinnili siunissaq ungasinnerusoq eqqarsaatigalugu aamma pikkorisaasoqartalernissaa siunertaavoq, pinngortitamut avatangiisinullu naalakkersuisoq oqarpoq.