Blok 5-imi toqutsineq: Unnerluutigineqartup nassuiaataa aana

Blok 5-imi toqutsineq pillugu suliaq, tassa 20-nik ukiullip toqqorsivimmi 2024-mi oktobarimi  nassaarineqarnera pillugu suliaq ullumi nanginneqarpoq.

Unnerluutigineqartoq angut 42-nik ukiulik inimi eqqartuussiffiusumi eqqissisimalluinnarlunilu oqaaseqarusunnersoq aperineqaraangami ‘naamik’-mik maannamut akiinnartarpoq.

Taamaammat tamanna pissutigalugu taassuma politiinut oktobarip aqqaneq-aappaani tigusarineqarnermini nassuiaataa eqqartuussivimmi ataasinngornermi ullaakkut atuarneqarpoq.

Angullu – taamani aamma – 20-nik ukiulimmik toqutsisutut pinngitsuunerarsimasoq uani saqqummiunneqarpoq. Taassuma illersuisuata eqqartuussivimmut tamanna aamma nassuiaatigaa. Angut pinngitsuunerpoq, taassumalu illersuisuata pinngitsuutitsisoqarnissaa anguniarpaa.

Blok 5 ilisimagaa

42-nik ukiullip pinerlineqartoq Nuummi angerlarsimaffeqanngitsut avatangiisaannit ilisimallugu ilisarisimasarinaguli politiinut oqaatigaa. Angutip pinerlineqartoq Frelsens Hærimi taamaallaat takunikuuaa, taassumalu oqarnera naapertorlugu inuppassuit neriartortarput.

- Immaqa 30-t missaanniittut, taanna oqarsimasoq killisiuinermit nalunaarusiami allassimavoq.

Angutilli blok 5 ilisimalluarlugu oqaatigaa, taassumami qatanngutaa inissiat ilaanni najugaqarpoq, inissiaqarfimmilu allanik aamma ilisarisimasaqarluni, taannalu toqqorsivimmi suliami pineqartumi ilaanni sinittarnerarpoq. Tassa 20-nik ukiullip 2024-mi oktobarip sisamaanni nassaarineqarfiani.

Inussap ipaasaanut nassuiaataat

Unnerluutigineqartup inuaasa ipaasaat pinerliffiusumi aammi nassaarineqarsimasut eqqartuussivimmi siusinnerusukkut ilisimaneqalerpoq. Tamanna pillugu politiinit killisiorneqarnermini aamma aperineqarpoq.

- Aalakuungaatsiarama, immaqa iserfigisimassavara, 42-nik ukiulik politiinut 2024-mi oktobarimi oqarpoq.

Angutip 2024-mi oktobarip aallaqqaataannit oktobarip aqqaneq-aappaanni tigusarineqarnissami tungaanut sulerisimanini eqqaamaneraa politiinit aperineqarpoq.

- Eqqaamanngilara. Piffissami tassani arlaleriarlunga aalakoorpunga, angut politiinut nassuiaavoq.

Angutip angunni napparsimammat illoqarfiit pingaarnersaanniilluni taamaammat ilaquttani ilagiartorlugit Ilulissaniit Nuummukarsimalluni, politiinut oktobarip aqqarneq aappaanni oqarpoq.

Angulli aalakoorpallaarnini pissutigalugu unnuiffigisartakkaminit anisitaasimanini pissutigalugu ilaquttani takuallaarneq ajornerarpai.

- Aamma uersagaanera pissutigalugu, taanna politiinut oqarpoq.

Taassuma piffissami oktobarip aappaannit oktobarip sisamaannut toqqorsivimmiissimanani pinerlineqartorluunniit ilagisimanagu oqaatigaa.

Taassuma politiit sumiiffimmi ullut taakku kinguneranni suliaqartut takusimanerarpai, qullermillu ikitsiniarami tassannga peersitaasimalluni, pisorli imaluunniit pinerlineqartup kinaanera ilisimanagu politiinut 2024-mi nassuiaatigaa.

Eqqartuussut aqagu nalunaarutigineqassasoq

Nalunaarusiap atuarneqarnera naammassineqarmat eqqartuussissuserisup nassuiaat atuaqqaarneqarsimanngitsoq ilisimatitsissutigivaa 42-nillu ukiulimmit suli atsiorneqanngitsoq.

Taamaammat killisiuinermit nalunaarusiap atuarneqarnerata kingorna 2024-mi oktobarip aallartinnerani susoqarsimanera aamma 20-nik ukiullip qangarpiaq toqunneqarsimanera suli nalunarpoq. 

Eqqartuussivimmi suliap aqagu naammassineqarluni eqqartuussuteqarfiunissaa naatsorsuutigineqarpoq. Unnerluussisussaatitaasut isumaqatigineqarunik 42-nik ukiulik Danmarkimi tarnikkut napparsimasunut napparsimmavimmut inissinneqartussanngortinneqaratarsinnaavoq.

Illersuisorli isumaqatigineqassaguni angut pinngitsuutinneqarsinnaavoq.