Greenland Airportsip pisortaanera suliniunnaartussanngortoq
Kalaallit Nunaanni mittarfiit nutaat pingasut akornanni kingulleq naammassineqangajalerpoq.
Nuummi mittarfik nutaaq 2024-mi naammassineqarpoq. Qaqortumilu mittarfimmut timmisartuussineq siulleq apriilimi takuarput. Ilulissanilu mittarfittaassaq pilersaarutit naapertorlugit oktobarip 29-anni ammartussaavoq.
Jens Lauridsenip Greenland Airportsimi pisortaanertut suliassani taamaasilluni naammassissavai, taannami pisussaaffeqartinneqarluni suliniummut isumaqatigiissut tunngavigalugu sulilerpoq, tassa Nuummi, Qaqortumi Ilulissanilu mittarfiit naammassineqarnissaat qulakkeertussaallugu.
Greenland Airports tusagassiuutinut taama nalunaaruteqarpoq.
- Kalaallit Nunaanni nutaanik mittarfiliornissamik suliaqarnermut siuttuuneq misigisassaavoq asseqanngilluinnartoq nuannaarutigisorujussuuaralu. Oqaatigilluaannarlugu qaqqat qaarsullu aallarniutigaagut, Nuummi Qaqortumilu nutaaliaasunik piffissami kingullermi mittarfeqalerpugut – Ilulissani Mittarfiup ingerlanneqarnera aamma aallartingajalerparput, Jens Lauridsen tusagassiuutinut nalunaarummi oqarpoq.
Jens Lauridsenip mittarfiliortiternernut suliniummi atorfinitsinneqarnera tusagassiuutinut nalunaarummi allassimavoq, mittarfiillu naammassiartulerneranni pisortaanertut tunuarnissaa taamaammat pissusissamisoortoq nalunaarutigineqarpoq.
- Aallaqqaataaniilli suliassarisimavara mittarfinnik pingasunik sanaartornissaq ingerlatsilernissarlu, maannakkullu suliassaq naammassingajalerpoq, sumullu ingerlariaqqinnissara takorloornissaa tullinnguulluni, Jens Lauridsen oqarpoq.
Nuummi mittarfik isornartorsiorneqartoq
Nuummi mittarfittaaq 2024-mi novembarimi ammarmat oqaluuserineqangaatsiarpoq. Sillimaniarnermut misissuisarfimmi taamanikkut ajornartorsiortoqarpoq, inuit tunuleriiaattut amerlallutik, nassatallu ilaatigut ullualunni tammaaneqartarlutik.
Ukiup affaata siulliup ingerlanerani ajornartorsiortoqartarsimanera Jens Lauridsenip nassuerutigaa.
Mittarfiliortitsinerit pillugit suliniutit ilaatigut oqimaassimaqisut, Greenland Airportsimi siulersuisut siulittaasuata Jens Wittrup Willumsenip miserratiginngilaa:
- Jens Lauridsen Kalaallit Nunaata oqaluttuarisaanerani attaveqaasersuutinut suliassat annersaata, pisariunersaata anguniagaqarfiulluarnerpaartaasalu piviusunngortinnissaannut qitiulluinnartumik inissisimasimavoq, taanna tusagassiuutinut nalunaarummi oqarpoq, nangillunilu:
Kunngeqarfimmi nutaanik mittarfiliorneq imminermini qaqutigoortuuvoq. Tassunga ilanngukkaanni suliassat issittumi pissutsit atuutsillugit, peqatigisaanillu sivisuumik, suliarineqarsimasut, anigorniagassaqartorujussuunera paasineqarsinnaavoq, Jens Wittrup Willumsen oqarpoq.
Kingoraartissamik maanna ujaasisoqartussanngortoq
Greenland Airports pisortaanermik nutaamik maanna ujaasisussanngortoq tusagassiuutinut nalunaarummi allassimavoq.
Suliassarujussuarlu nanginneqartussanngorpoq:
- Greenland Airports Jensimut qujassutissarpassuaqarpoq. Sanaartornermut aaqqissuussaanerup aallartilaarnerani ikittuinnarnik sulisoqarluni aallartippoq, aamma Mittarfeqarfiit aamma Kalaallit Airports kattunnerisa kingorna Greenland Airports sanaartornermut suliassat ingiaqatigisaannik Kalaallit Nunaanni sullivinni annersanngorluni ineriartorsimavoq. Kingoraartissaata suliassaqartorujussuunissaa qularutissaanngilaq, Jens Wittrup Willumsen oqarpoq.
Greenland Airports mittarfinnik ingerlatsineq pingaarnertut ukkatarisussanngorlugu maannakkut nutaamik ingerlalertussanngorpoq.
Jens Lauridsen Greenland Airportsimut pisortaaninngortussamut, aaqqissuussaasumillu sukumiisumillu tunniussinissap qulakkeernissaa siunertaralugu, ikiuunnissamut piareersimassaaq.
