Iranimi ministerip USA isumaqatiginninniarnerit iluatsinnginnerannut pisuutikkaa

Iranip nunanut allanut ministeria, Abbas Araghchi russit illoqarfissuannut, Sankt Petersborgimut ataasinngornermi ullaap tungaani tikippoq.

Taassuma Ruslandip præsidentia, Vladimir Putin ullumi kingusinnerusukkut ataatsimeeqatigissavaa.

Nutaarsiassaqartitsivik AFP allappoq.

Iranip USA-llu akornanni eqqissinermut suli isumaqatigiissuteqartiqannginnera USA-p pisuussutigigaa Araghchi tikinnermi kingorna oqarpoq.

- USA-p ingerlatsinera pissutigalugu isumaqatiginninniarnerit siulii – naak siuariarsimagaluartut – piumasaqaatit annertuut pissutigalugit angusaqarfiunngillat, Araghchi oqarpoq.

Iranip Kangerliumanersuup nerukinnerata ammaqqinnissaanut aamma USA-p Iranillu sorsunneranik naammassinninnissamut siunnersuut nutaaq USA-mut pakistanimiut isumaqatiginninniartartui aqqutigalugit nassiukkaa, Amerikamiut tusagassiorfiata, Axiosip sapaammi allaaseraa.

Axios Amerikamiut atorfilittaannit atilerneqanngitsunit aamma suliamut atatillugu ilisimasalinnit tusarfinnit allanit marlunnit paasissutissarsivoq. Paasissutissat Iranimit imaluunniit Amerikamiut allattoqarfiannit uppernarsarneqanngillat.

Abbas Araghchi sapaatip akunnerata naanerani Pakistanimiippoq, taassumalu Amerikamiut sinniisui pilersaarut malillugu naapittussaavai. Taamaattoqanngilarli.

Nukissiuutit akii qaffattut

USA-p Amerikamiut sinniisunik Pakistanimut Iranimik isumaqatiginninniariartortitsinissaq pilersaarutigigaa, Præsidentip illorsuata tallimanngormat aamma paasissutissiissutigaa, USA-lli præsidentiata, Donald Trumpip pilersaarutit kingusinnerusukkut allanngortippai.

Tamanna pissutigalugu Amerikamiut aallartitassaasa, Jared Kushnerip aamma Steve Witkoffsip angalanissamut pilersaarutaat unitsinneqarput.

Trumpip Amerikamiut umiarsuarnut Kangerliumanersuup nerukinnera aqqutigalugu Iranip umiarsualivianut umiarsualivianiillu angalasunut mattussisinini nageqqikkusullugu, Fox Newsimit apersorneqarnermini ersersippaa.

Iranip inuinnaat umiarsuakkut Kangerliumanersuup nerukinnera aqqutigalugu angallannerat tamarmi sorsunnerup februaarip 28-anniaallartimmalli matoqqavaa.

Nunarsuarmi uulia gassillu ilarujussui pissutsit naliginnaasut atorlugit kangerliumaneeqqat Persiap Kangerliumarnganik Omanillu Kangerliumarnganik atassusiisut aqqutigalugit assartorneqartarnerat pissutigalugit nukissiuutit akii nunarsuarmi tamarmi qaffaqqapput.

Iranip nunami atomip nukinganik atuinini killilissagaa Trumpip kissaatigaa. Taassuma Iranip atomimik qaartartuliornissaa pinaveersaartikkusuppaa. Iranili atomimik sakkussiunnginnerarpoq, nunaminnilu atomip nukinganik atuineq eqqissinermut taamaallaat siunertaqarneq aalajangiusimallugu.

USA-p Iranillu akroannni sakkuaakkunnaarallarneq sapaatip akunnerata siuliani pingasunngornermi unnuami qaangiuttussaagaluartoq piffissaligaanngitsumik sivitsorneqarpoq.

/ritzau/