Unneqqarinnissaq IA-p aappaagu qinersereernitsinni siuttuuinnarnissaanik qularnaarisuussasoq
![](/sites/default/files/styles/image_934x467/public/2024-07/IMG_2595.jpg?h=613bf992&itok=iwDLGjJ8)
Unneqqarinneq Inatsisartunut aappaagu qinersereernitsinni politikkikkut siuttunngortitsisuusussaassaaq. IA-p siulittaasuatut qinigaaqqittoq Múte B. Egede siulersuisuunernik qinersereernerminni taama oqarpoq. Taanna partiillu siulittaasuata tullia qinigaaqqipput, siulersuisuunerilli nutaanik aamma ilaasortartaqalerlutik.
IA-mi siulittaasoq Múte B. Egede siulittaasullu tullia Aqqaluaq B. Egede qinersereerneranni oqaloqatigaavut.
Inatsisartunut qinersinissatsinnut ukioq ataasiujunnaarpoq, partiillu nunatsinni politikkikkut aqutsinermi siuttuuinnarnissaa tamaviaarutiginiaritsik IA-p siulersuisuunerisa Aasianni sapaatit akunnerata naanerani ataatsimersuarnerminni erseqqissarpaat.
Siuttuuinnarnissartilliuna qanoq qulakkeerniarniaraat?
- Suliassaq siullertut pingaartoq unaasorivara, unneqqarinnissaq. Suliat sooq taamatut ilusilerlutik suliarisariaqarneri, nuannersuinnavinnik suliaqarsinnaanngilagut, inuiaqatigiinnulli tamanut kingulissatsinnullu pitsaanerpaamik toqqammaveqartunik ingerlatitsinissaq suliassaraarput, Múte B. Egede oqarpoq nangillunilu:
- Taassuma saniatigut pingaarutilik tassaavoq atugarissaarnerput inerisassallugu, aningaasarsiorfiit nutaat ilaatigut takornariartitsinermit nukissiuutinik ataavartunik aatsitassarsiornermillu tunngaveqartut aalisarnermut tapertaalernissaat suli annerulersissallutigu.
Qinersinissat aningaasanullu inatsisiliornissaq ukkatarigaat
Aqqaluaq B. Egede Pipaluk Lyngemit IA-p sapaatiummat ataatsimeersuarnerani siulersuisuunernik qinersinermi unammillerneqarpoq. Taakkualu parteeqatiminnut qineqqusaalaavissorput.
IA-p siulersuisuuneri Inatsisartunut aappaagu qinersinissamut aqutsinermik misilittagalinnik siuttoqarnissaat pingaaruteqartoq, Aqqaluaq B. Egedep oqalugiarnermini erseqqissarpaa. Taanna parteeqatimi amerlanerpaartaannit ilalerneqarpasippoq, tassami taasisinnaasut 48-t akornanni 33-nit taaguunneqarami.
![](/sites/default/files/styles/image_934x467/public/2024-07/Aqqaluaq%20b.jpg?h=4233ef75&itok=LVJw1BwC)
Partiip siulittaasuata tullia qinigaaqqereernermini suut ukkatariniarnerai aperaarput.
- Siunissami suliassat assersuutigalugu kommuninut aammali inatsisartunut qinersinissat aggerput. Taassumalu saniatigut aamma aningaasanut inatsimmik suliaqangajalerpugut taavalu ataatsimeersuarnermi aalajangersarneqartut politikkikkut naalakkersuinikkullu suliassatta timitalersornissaannut suliaqassalluta, Aqqaluaq B. Egede oqarpoq.
Ataqatigiissaarinermi siulittaasup tulliatut atuuffimmut qineqqusaarngaartut aamma marluupput, tassaasut Nivi Heilmann Efraimsen 43-nit taaguunneqareerluni qinigaasoq aamma Naya Sophia Pedersen Lyberth 13-init taaguunneqareerluni qinigaanngitsoortoq.
Bendt B. Kristiansen aamma qinigaaqqippoq aningaaserisuuinnassallunilu.