United Airlinesip ukioq kingulleq ilaasut amerlassusaat saqqummiukkaat

Timmisartut takornarianik USA-meersunik ilaasullit siulliit Nuummut maanna tikipput.

United Airlines, Newarkip Nuullu akornanni timmisartuussisartup uternertik nuannaarutigalugu tusagassiuutinut nalunaarummi oqaatigaa.

- Nuummut aasaanerani uternerput nuannaarutigaarput, Amit Badiani, United Airlinesimi Afrikamut tuniniaanermullu pisortaq oqarpoq.

- Kalaallit Nunaanni sullitatta Nuummiit Newarkip tungaanut toqqaannartumik timmisartuussineq aamma Amerikap avannaani, kujataani qiterpasissuanilu sumiiffinnut 80-init amerlanerusunut timmisartuussinissat suli iluaqutigissavaat.

Greenland Airports  tusagassiuutinut nalunaarummi nuannaarnertik aamma oqaatigaat.

- United Airlinesip aasaanerani timmisartuussisaleqqinnissaat nuannaarutigeqaarput, Greenland Airportsimi tuniniaanermut pisortaq René Von Ahm Laursen oqarpoq.

- Tamanna pitsaasumik nalituumillu suleqatigiinnermik pilersitseqatigiinnitsinnik ersersitsivoq, tamannalu Kalaallit Nunaata takornariarfissatut soqutigineqarnerulerneranut pissutaaqataavoq.

Juunip arfernanniit septembarip 23-ata tungaanut timmisartuussisoqartassaaq. Kalaallit Nunaannut Kalaallit Nunaanniillu sapaatip akunneranut marloriarluni timmisartuussisoqartassaaq.

Affaata missai

SAS-ip Københavnimiit Nuummut ukiup sinnerani timmisartuussisarunnaarniarnini maajip 28-anni nalunaarutigaa.

Tamanna bilitsinik tunisinerup ikinnerinik timmisartullu orsussaata akitsorneranik pissuteqarpoq.

United Airlinesip ilaasunik 4.800-nik Nuummut Nuummiillu timmisartuussinerni 58-iusuni siorna timmisartuussisimanini tusagassiuutinut nalunaarummi ilisimatitsissutigaa.

Timmisartumik Boeing 737 Max 8-mik, 166-it missaanniittunik ilaasoqarsinnaasumi ukioq manna timmisartuussisassapput.

Imaappoq, angalaffissami ilaasinnaasut katillugit 50 procentit missaanniittut ilaasorineqarsimapput.

Timmisartuni ilaasorisinnaasat kisitsisinngorlugit 83,6 procentit, siorna ilaasorineqarmata, timmisartorlutik angalasut nunarsuaq tamakkerlugu agguaqatigiissillugit aatsaat taama amerlatigaat. Silaannakkut angallannermi timmisartortitseqatigiiffiit kattuffiat IATA taama ilisimatitsivoq.

KNR-ip ilaasut qanoq amerlatiginissaat naatsorsuutaanersoq siunissamilu timmisartuussinissaannut tamanna qanoq kinguneqarsinnaanera United Airlinesimut apeqqutigaa.

Taakkua timmisartuussinerit naatsorsuutigisimasaannut naapertuunnerarpaat, aappaagumullu pilersaarutit oqaaseqarfigisinnaannginnerarlugit.