SAS ikummatissat akiisa qaffasinnerat pissutigalugu Nuummut timmisartuussissanngitsoq

Timmisartuutileqatigiiffik SAS Nuup Københavnillu akornanni ukiup 2026-ip sinnerani timmisartuussissanngilaq.

Tusagassiorfik silannakkut angallassinermik sammisaqartoq Check-in.dk taama allappoq.

SAS-ip aasaanerani timmisaartuussinissaagaluaq aallartissanngitsoq, timmisartuutileqatigiiffiup attaveqarnermut pisortaata , Alexandra Lindgren Kaoukjip, tusagassiorfimmut uppernarsarpaa. Taama aalajangerneq ikummatissat akiinik ilaajumasunillu peqquteqartoq, oqaatigineqarpoq.

Nuup Købehavnillu akornanni timmisartuussissarneq taamaaterataannaasoq, Check-in.dk-ip siusinnerusukkut allaaaserereerpaa.

Maajip 28-aniit timmisartuussisalernissaq pilersaarutaaqqaaraluarpoq, aallartinnissarlu juulip pingajuannut kinguartinneqarluni.

Timmisartuutileqatigiiffiup timmisartuussinissani 25-iusuni taamani siumut utimullu aki 15.893 koruuniussasoq, Check-in.dk-mit maajimi siusinnerusukkut paasissutissiissutigineqarpoq.

Unammilligaanili Air Greenlandimi billetti akikinnerungaartoq piffissami tassani pisiarineqarsinnaavoq.

Taamaammat billettinik tuniniaaneq siusinnerusukkut matoqqavissimasoq, Check-in.dk-mit paasissutissiissutigineqarpoq.

SAS Nuummut aasaanerani juunimi 2025 timmisartuussisalerpoq. Nunatsinnut tamanna sioqqullugu 2008-miilli timmisartuussisimanngilaq.

SAS-ip pisortaanerata, Anko van der Werffip, ilaarusuttoqassappat ukioq kaajallallugu timmisartuussisarnissamut kajumilluni, Check-in.dk timmisartuussinissamik ammaanersiornerani oqaatigaa.

SAS Nuummi mittarfissuaq ammarmat Nuummiit Københavnimut timmisartuussisalerpoq.

Mittarfiup Kangerlussuaq Kalaallit Nunaannut isaaffittut taarserlugu, atlantikoq qulaallugu angallannerup annerpaartaa isumagilerpaa.

Uulia akitsortoq 

Iranimi sorsunnerup Iranillu tamatuma maalitsigisaanik Kangerliumanersuup nerukinneranik Hormuzimik aqutsilernerata uulia akitsortippaa. Taamalimmat ikummatissat nunarsuarmi tamani akitsorput.

Tamanna timmisartuussisartuni, ikummatissamik pisariaqartitseqisuni malugineqarpoq.

Ikummatissat akitsornerisa kingunerisaanik SAS-ip timmisartuutaasa timmisarnerinut timmisartuutileqatigiifffik qaammammut 500 milliuunit koruuninik aningaasartuuteqartartoq timmisartuusssisarnermik suliallit aterminnik isertuussisut tusagassiorfimmut Finansimut maajimi siusinnerusukkut naliliipput.

Tamanna SAS-imiit oqaaseqarfigineqanngilaq.

SAS majimi timmisartuussinissaanik 1200-nik taamaatitsiinnarsimasoq Check-in.dk AeroRoutesip kisitsinera tunngavilgalugu allappoq.

AeroRoutes Timmisartuutileqatigiit timmisartuussinisssaminnik allannguisarnerannik malinnaasuuvoq.

Istanbulimut timmisartuussinerit nutaat ilaatigut taamaatiinnarneqarnerat Check-in.dk-ip pingasunngornermi allaaseraa.

Tusagassiuutip timmisartuussinerit juunimi juulimilu unitsinneqarpasinnerat immaqalu aggustimi aallarteqqinneqarsinnaanissaat aamma allaseraa. Bilitsili siumut utimullu ilaassutissaq akikinnerpaaq 9591 koruuninik akeqarpoq.

/Ritzau/